બોલરોના ખરાબ પ્રદર્શનને કારણે ટીમ ઈન્ડિયા ન્યૂઝીલેન્ડ સામેની પ્રથમ વનડે હારી ગઈ છે. પરંતુ ટીમ માટે એક સારા સમાચાર સામે આવ્યા છે. ભારતીય ટીમના સ્ટાર ફાસ્ટ બોલર જસપ્રિત બુમરાહે ટીમમાં વાપસી કરવા માટે ટ્રેનિંગ શરૂ કરી દીધી છે.
એશિયા કપ અને T20 વર્લ્ડ કપ જેવી મોટી ટૂર્નામેન્ટમાં ઈજાના કારણે ટીમની બહાર રહેલો બુમરાહ બેંગલુરુમાં નેશનલ ક્રિકેટ એકેડમી (NCA)માં ફરી ફિટનેસ મેળવવાના માર્ગે છે.
જસપ્રિત બુમરાહે શુક્રવારે તેના ઈન્સ્ટાગ્રામ એકાઉન્ટ પરથી એક વીડિયો શેર કર્યો છે, જેમાં તે ખૂબ જ ફિટ દેખાઈ રહ્યો છે અને દોડવાની સાથે અન્ય ઘણી કસરતો કરતો જોવા મળી રહ્યો છે. પોસ્ટ શેર કરતા જસપ્રિત બુમરાહે લખ્યું, “ક્યારેય સરળ નથી, પરંતુ હંમેશા મૂલ્યવાન.”
ન્યુઝીલેન્ડ સામેની ODI શ્રેણીની સમાપ્તિ પછી, ભારતીય ટીમ ડિસેમ્બરમાં બાંગ્લાદેશનો પ્રવાસ કરશે, જેના માટે ઓલ-સ્ટાર ખેલાડીઓ પરત ફરશે, જેને T20 વર્લ્ડ કપ પછી ન્યુઝીલેન્ડના પ્રવાસ માટે આરામ આપવામાં આવ્યો હતો. પરંતુ બુમરાહની વાપસી હજુ શક્ય નથી.