ભારત અને ઇંગ્લેન્ડ વચ્ચેની વનડે શ્રેણી પૂરી થયા બાદ મેદાનની હરીફાઈ મિત્રતામાં બદલાઈ ગઈ હતી. ટીમ ઈન્ડિયાના અનુભવી ઓપનર રોહિત શર્માએ ઇંગ્લેન્ડના સ્ટાર વિકેટકીપર-બેટ્સમેન જોસ બટલરને પોતાની સહી કરેલી ટીમ ઈન્ડિયાની જર્સી ભેટમાં આપી હતી. રોહિતની આ ખાસ ભેટથી બટલર ખૂબ જ ભાવુક થઈ ગયો અને તેણે સોશિયલ મીડિયા પર પોતાની ખુશી વ્યક્ત કરી હતી.
રોહિતે જર્સી પર પોતાના હસ્તાક્ષર સાથે ખાસ સંદેશ પણ લખ્યો હતો. તેમણે લખ્યું, “Dear Jos, Loved my time playing with and against you.” એટલે કે, “પ્રિય જોસ, તારી સાથે અને તારી સામે રમવાનો સમય મને ખૂબ ગમ્યો.” આ સંદેશે બંને ખેલાડીઓ વચ્ચેના પરસ્પર સન્માન અને મિત્રતાને વધુ ઉજાગર કરી હતી.
જોસ બટલરે પોતાના ઈન્સ્ટાગ્રામ સ્ટોરીમાં આ જર્સીનો ફોટો શેર કરીને લખ્યું કે, “વિરોધી ટીમના ખેલાડીની આ એવી જર્સી હતી, જે હું હંમેશાથી ઈચ્છતો હતો. રોહિત મારા સર્વકાલીન મનપસંદ ખેલાડીઓમાંનો એક છે. હું આ ભેટને હંમેશા સાચવી રાખીશ. આભાર રોહિત.” બટલરના આ શબ્દોએ ક્રિકેટ ચાહકોનું દિલ જીતી લીધું હતું.
ઉલ્લેખનીય છે કે રોહિત શર્મા અને જોસ બટલર વચ્ચેનો સંબંધ માત્ર આંતરરાષ્ટ્રીય ક્રિકેટ પૂરતો મર્યાદિત નથી. બંને અગાઉ આઈપીએલમાં મુંબઈ ઈન્ડિયન્સ તરફથી એક જ ડ્રેસિંગ રૂમમાં સાથે રમી ચૂક્યા છે. તેથી બંને વચ્ચે વર્ષોથી સારો સંબંધ રહ્યો છે.
તાજેતરમાં સમાપ્ત થયેલી ભારત-ઇંગ્લેન્ડ વનડે શ્રેણીમાં રોહિત શર્માએ લોર્ડ્સમાં શાનદાર સદી ફટકારીને પોતાની ક્લાસ સાબિત કરી હતી. ભલે ભારત શ્રેણી જીતવામાં નિષ્ફળ રહ્યું હોય, પરંતુ રોહિતની આ ઇનિંગ્સ અને ત્યારબાદ બટલરને આપવામાં આવેલી સહીવાળી જર્સીએ ક્રિકેટના મેદાન પર રમતગમતની ભાવના અને ખેલાડીઓ વચ્ચેના પરસ્પર આદરનું સુંદર ઉદાહરણ પૂરું પાડ્યું છે.