ન્યૂઝીલેન્ડ ક્રિકેટ માટે દુઃખદ સમાચાર સામે આવ્યા છે. પૂર્વ કિવી ક્રિકેટર અને દિગ્ગજ ફાસ્ટ બોલર Bob Blairનું તેમના 94મા જન્મદિવસે ઇંગ્લેન્ડમાં અવસાન થયું છે. અહેવાલો અનુસાર બોબ બ્લેરે 23 જૂન, 2026ના રોજ ઇંગ્લેન્ડના વોરિંગ્ટનમાં અંતિમ શ્વાસ લીધા હતા. તેમના નિધનથી ન્યૂઝીલેન્ડ ક્રિકેટ જગતમાં શોકની લાગણી ફેલાઈ ગઈ છે.
બોબ બ્લેર ન્યૂઝીલેન્ડના 1950 અને 1960ના દાયકાના જાણીતા ઝડપી બોલરોમાં સામેલ હતા. તેમણે પોતાના આંતરરાષ્ટ્રીય કરિયરમાં 19 ટેસ્ટ મેચ રમી હતી અને 43 વિકેટ ઝડપી હતી. જોકે ટેસ્ટ ક્રિકેટમાં તેઓ મોટી સફળતા મેળવી શક્યા નહોતા, પરંતુ સ્થાનિક ક્રિકેટમાં તેમનું પ્રદર્શન અદ્ભુત રહ્યું હતું. વેલિંગ્ટન માટે રમતા તેમણે પ્રથમ-શ્રેણી ક્રિકેટમાં 500થી વધુ વિકેટો લીધી હતી અને ટીમને અનેક યાદગાર જીત અપાવી હતી.
બોબ બ્લેરનું નામ માત્ર ક્રિકેટ માટે જ નહીં પરંતુ તેમના જીવનની એક અત્યંત ભાવુક ઘટનાને કારણે પણ હંમેશા યાદ કરવામાં આવે છે. 1953માં દક્ષિણ આફ્રિકા પ્રવાસ દરમિયાન તેમને ખબર પડી હતી કે તેમની મંગેતર નેરિસા લવનું ટાંગીવાઈ રેલ દુર્ઘટનામાં અવસાન થયું છે. આ દુઃખદ સમાચાર છતાં તેઓ મેદાન પર ઉતર્યા હતા અને ટીમ માટે બેટિંગ કરી હતી. તેમની આ હિંમત અને રમત પ્રત્યેની પ્રતિબદ્ધતાને ક્રિકેટ ઇતિહાસની સૌથી પ્રેરણાદાયી ઘટનાઓમાંની એક માનવામાં આવે છે.
ક્રિકેટમાંથી નિવૃત્તિ બાદ બ્લેરે કોચ તરીકે પણ મહત્વપૂર્ણ યોગદાન આપ્યું હતું. તેમણે ઇંગ્લેન્ડ અને ઝિમ્બાબ્વેમાં યુવા ખેલાડીઓને માર્ગદર્શન આપ્યું હતું. તેમના નિધન સાથે ક્રિકેટ જગતે એક એવા ખેલાડીને ગુમાવ્યો છે, જેઓ માત્ર પોતાની રમત માટે જ નહીં પરંતુ અસાધારણ માનસિક શક્તિ અને સંઘર્ષ માટે પણ યાદ રાખવામાં આવશે.
Bob Blair, whose courage in the face of unimaginable grief became one of New Zealand sport’s most enduring stories, has passed away in England on his 94th birthday.
More | https://t.co/ulvE4L7pBY pic.twitter.com/gThNoT6uGn
— BLACKCAPS (@BLACKCAPS) June 24, 2026