ભારતીય મહિલા ક્રિકેટ ટીમની ઉપકપ્તાન અને સ્ટાર ઓપનર Smriti Mandhanaએ વધુ એક ઐતિહાસિક સિદ્ધિ પોતાના નામે નોંધાવી છે. વિશ્વપ્રસિદ્ધ TIME મેગેઝિને જાહેર કરેલી ‘100 Most Influential People in Sports 2026’ની યાદીમાં સ્થાન મેળવનારી તે એકમાત્ર ભારતીય ખેલાડી બની છે. આ સન્માન માત્ર તેના ક્રિકેટિંગ પ્રદર્શન માટે જ નહીં, પરંતુ રમતજગતમાં તેના વધતા પ્રભાવ અને મહિલાઓના ક્રિકેટને નવી ઊંચાઈએ પહોંચાડવામાં આપેલા યોગદાન માટે પણ આપવામાં આવ્યું છે.
સ્મૃતિ મંધાનાએ છેલ્લા કેટલાક વર્ષોમાં મહિલા ક્રિકેટમાં અસાધારણ પ્રદર્શન કર્યું છે. ડાબોડી બેટર તરીકે તેણે અનેક રેકોર્ડ્સ પોતાના નામે કર્યા છે. તેઓ આંતરરાષ્ટ્રીય મહિલા ક્રિકેટમાં સૌથી વધુ સદી ફટકારનાર ખેલાડીઓમાં સામેલ છે અને ત્રણેય આંતરરાષ્ટ્રીય ફોર્મેટમાં સદી નોંધાવનારી પ્રથમ ભારતીય મહિલા ક્રિકેટર પણ બની છે.
TIME દ્વારા જાહેર કરવામાં આવેલી આ પ્રથમ TIME100 Sports યાદીમાં વિશ્વભરના એવા ખેલાડીઓને સ્થાન આપવામાં આવ્યું છે જેણે રમતની દુનિયામાં માત્ર મેદાન પર જ નહીં પરંતુ મેદાન બહાર પણ નોંધપાત્ર પ્રભાવ પાડ્યો છે. આ યાદીમાં ફૂટબોલ, ટેનિસ, એથ્લેટિક્સ અને ક્રિકેટ સહિત વિવિધ રમતોના દિગ્ગજ ખેલાડીઓનો સમાવેશ કરવામાં આવ્યો છે, જેમાં સ્મૃતિ મંધાનાનું નામ ખાસ ચર્ચામાં રહ્યું છે.
મંધાનાની આ સિદ્ધિ ભારતીય મહિલા ક્રિકેટ માટે ગૌરવની ક્ષણ છે. છેલ્લા કેટલાક વર્ષોમાં તેની આગેવાની અને સતત પ્રદર્શનના કારણે મહિલા ક્રિકેટની લોકપ્રિયતા નોંધપાત્ર રીતે વધી છે. તેઓ યુવા ખેલાડીઓ માટે પ્રેરણાસ્ત્રોત બની છે અને અનેક યુવતીઓને ક્રિકેટમાં કારકિર્દી બનાવવા પ્રોત્સાહિત કરી રહી છે.
TIME જેવી વૈશ્વિક સંસ્થાની આ માન્યતા દર્શાવે છે કે સ્મૃતિ મંધાનાનો પ્રભાવ હવે માત્ર ભારત પૂરતો સીમિત નથી રહ્યો, પરંતુ તેઓ વિશ્વ રમતજગતની સૌથી પ્રભાવશાળી હસ્તીઓમાં સ્થાન બનાવી ચૂક્યા છે.