રોહિત શર્માની આગેવાની હેઠળની ભારતીય ટીમ બાંગ્લાદેશ સામે વનડે અને ટેસ્ટ શ્રેણી રમવા માટે ગુરુવારે બાંગ્લાદેશ પહોંચી હતી. ત્રણ મેચની વનડે સીરીઝની પ્રથમ મેચ રવિવારે ઢાકામાં રમાશે અને તેના માટે ટીમ ઈન્ડિયાના સ્ટાર બેટ્સમેન વિરાટ કોહલીએ જોરશોરથી તૈયારીઓ શરૂ કરી દીધી છે.
કોહલીએ શુક્રવારે સોશિયલ મીડિયા પર તેના ટ્રેનિંગ સેશનની કેટલીક તસવીરો શેર કરી હતી.
ભારતીય ટીમ બાંગ્લાદેશ પ્રવાસ પર ત્રણ વનડે અને બે ટેસ્ટ મેચ રમશે અને આ બંને શ્રેણીમાં વિરાટ કોહલી રમતો જોવા મળશે. ગયા મહિને ઓસ્ટ્રેલિયામાં T20 વર્લ્ડ કપ સમાપ્ત થયા બાદ સ્ટાર બેટ્સમેન વિરાટ કોહલી, રોહિત શર્મા અને કેએલ રાહુલને ન્યૂઝીલેન્ડના પ્રવાસ માટે આરામ આપવામાં આવ્યો હતો.
ટૂર્નામેન્ટ દરમિયાન વિરાટ કોહલીએ સૌથી વધુ રન બનાવ્યા હતા. તેણે 296 રન બનાવ્યા હતા. કોહલીની સાથે રોહિત શર્મા અને કેએલ રાહુલ પણ કમબેક કરવા જઈ રહ્યા છે. કેએલ રાહુલને વાઇસ કેપ્ટન બનાવવામાં આવ્યો છે.
— Virat Kohli (@imVkohli) December 2, 2022
સ્ટાર બેટ્સમેને 4 ડિસેમ્બરે પ્રથમ ODI પહેલા પ્રેક્ટિસ સેશનની કેટલીક તસવીરો તેના ઈન્સ્ટાગ્રામ પર શેર કરી હતી. આમાં કોહલી બેટિંગ પ્રેક્ટિસ સાથે ફૂટબોલ રમતા જોવા મળે છે.
ભારત બાંગ્લાદેશમાં ત્રણ વનડે (4, 7 અને 10 ડિસેમ્બર) અને બે ટેસ્ટ રમવાનું છે અને રોહિત શર્માની આગેવાની હેઠળની મજબૂત ટીમ પાડોશી દેશનો પ્રવાસ કરશે. ટેસ્ટ મેચો 14 થી 18 ડિસેમ્બર સુધી ચટગાંવમાં અને 22 થી 26 ડિસેમ્બર દરમિયાન મીરપુરમાં રમાશે.
ભારતે બાંગ્લાદેશના પ્રવાસ માટે એક મજબૂત ટીમની પસંદગી કરી હતી, પરંતુ શ્રેણી શરૂ થવાના થોડા દિવસો પહેલા ટીમમાં મોટો ફેરફાર કરવો પડ્યો હતો. ટીમના સ્ટાર ઓલરાઉન્ડર રવિન્દ્ર જાડેજા અને યશ દયાલ ODI શ્રેણીમાંથી બહાર થઈ ગયા છે.