ટીમ ઈન્ડિયાના કેપ્ટન રોહિત શર્માને બાંગ્લાદેશ સામેની બીજી વનડે દરમિયાન અંગૂઠામાં ઈજા થઈ હતી. બાંગ્લાદેશની ઈનિંગની બીજી જ ઓવરમાં રોહિત શર્માને સ્લિપમાં કેચ લેતી વખતે તેના અંગૂઠામાં ઈજા થઈ હતી, ત્યારબાદ તેને સ્કેન માટે લઈ જવો પડ્યો હતો.
બાંગ્લાદેશે ભારત સામે જીતવા માટે 272 રનનો ટાર્ગેટ આપ્યો હતો અને વિરાટ કોહલીએ શિખર ધવને સાથે મળીને ટીમ ઈન્ડિયાની ઇનિંગ્સની શરૂઆત કરી હતી. વનડેમાં આઠ વર્ષ બાદ વિરાટે ઇનિંગ્સની શરૂઆત કરી છે. ODIમાં ઓપનર તરીકે વિરાટ કોહલીનો રેકોર્ડ પણ ઘણો નબળો છે અને ફરી એકવાર તે ઓપનર તરીકે નિષ્ફળ ગયો છે.
વિરાટ કોહલી છ બોલમાં પાંચ રન બનાવીને ઇબાદત હુસૈન દ્વારા ક્લીન બોલ્ડ થયો હતો. ભારતે બીજી ઓવરમાં જ વિરાટ કોહલીના રૂપમાં પ્રથમ વિકેટ ગુમાવી હતી.
હવે વનડેમાં ઓપનર તરીકે વિરાટ કોહલીના રેકોર્ડ પર એક નજર કરીએ. વિરાટ કોહલીએ ભારત માટે 264 વનડે રમી છે અને આ સમયગાળા દરમિયાન તેણે માત્ર સાત વખત ઇનિંગ્સની શરૂઆત કરી છે. આ દરમિયાન વિરાટે સાત મેચમાં 23.71ની એવરેજથી માત્ર 166 રન બનાવ્યા છે. વિરાટ કોહલી ઓપનર તરીકે માત્ર એક ODI ફિફ્ટી ફટકારવામાં સફળ રહ્યો છે.