ઓસ્ટ્રેલિયાના ઘરેલુ ક્રિકેટ માળખામાં આર્થિક દબાણ વધતું જઈ રહ્યું છે. મીડિયા રિપોર્ટ્સ અનુસાર, દેશના ઘણા સિનિયર ખેલાડીઓ હવે બિગ બેશ લીગ (BBL) અને વિદેશી ફ્રેન્ચાઇઝ લીગ્સ વચ્ચે વધતા નાણાકીય અંતરને લઈને ગંભીર ચર્ચા કરી રહ્યા છે. આ મુદ્દે ખેલાડીઓએ ક્રિકેટ ઓસ્ટ્રેલિયા (CA) સાથે પણ વાતચીત શરૂ કરી છે.
રિપોર્ટ મુજબ ઓસ્ટ્રેલિયાના ટેસ્ટ અને ODI કેપ્ટન પેટ કમિન્સ સહિત ઘણા અનુભવી ખેલાડીઓ 2028 પહેલા પોતાના ભવિષ્યને લઈને મોટો નિર્ણય લઈ શકે છે. જો BBLમાં ખેલાડીઓને મળતી સેલેરી આંતરરાષ્ટ્રીય ફ્રેન્ચાઇઝ લીગ્સની સરખામણીએ સ્પર્ધાત્મક નહીં બને, તો તે SA20 જેવી વિદેશી લીગમાં રમવા માટે ‘નો ઓબ્જેક્શન સર્ટિફિકેટ’ (NOC) માંગવાની તૈયારીમાં છે.
ખેલાડીઓનું માનવું છે કે ઓસ્ટ્રેલિયાની ટોચની T20 લીગ માટે સંપૂર્ણ સમર્પિત રહેવા ટોચના ખેલાડીઓને લગભગ 1 મિલિયન અમેરિકન ડોલર એટલે કે અંદાજે 10 કરોડ રૂપિયાનું વેતન મળવું જોઈએ. હાલમાં વિદેશી લીગ્સમાં મળતા મોટા ઓફર્સને કારણે આ માંગ વધુ મજબૂત બની છે.
અગાઉ પેટ કમિન્સ, જોશ હેઝલવુડ અને મિચેલ સ્ટાર્ક જેવા ખેલાડીઓને ઇંગ્લેન્ડની ‘ધ હન્ડ્રેડ’ લીગમાંથી લગભગ 8 કરોડ રૂપિયાના ઓફર્સ મળ્યા હતા. જોકે, તે ઓફર્સ સ્વીકાર્યા હોત તો તે બાંગ્લાદેશ સામેની ટેસ્ટ સિરીઝ ચૂકી જતા.
‘ધ એજ’ની રિપોર્ટ અનુસાર ક્રિકેટ ઓસ્ટ્રેલિયા હવે BBLના ખેલાડી કરાર સિસ્ટમમાં મોટા ફેરફારો પર વિચાર કરી રહ્યું છે. વિદેશી ખેલાડીઓના ડ્રાફ્ટ સિસ્ટમને હટાવી સીધા કરાર કરવાની પદ્ધતિ અપનાવવાની શક્યતા પણ ચર્ચામાં છે.
આગામી વર્ષોમાં આંતરરાષ્ટ્રીય શેડ્યૂલ અને ફ્રેન્ચાઇઝ ક્રિકેટ વચ્ચેનું સંતુલન જાળવવું ક્રિકેટ ઓસ્ટ્રેલિયા માટે મોટો પડકાર બની શકે છે.