ભારતીય ક્રિકેટના પૂર્વ ટેસ્ટ ઉપકપ્તાન અજિંક્ય રહાણેએ તાજેતરમાં યુવા બેટર વૈભવ સૂર્યવંશીના આંતરરાષ્ટ્રીય કરિયરને લઈને મહત્વપૂર્ણ નિવેદન આપ્યું છે. રહાણેનું માનવું છે કે માત્ર IPLમાં સફળતા મળવાથી કોઈ ખેલાડી આંતરરાષ્ટ્રીય ક્રિકેટમાં પણ તરત જ સફળ થશે, એવું માનવું યોગ્ય નથી. તેણે કહ્યું કે IPL અને આંતરરાષ્ટ્રીય ક્રિકેટ વચ્ચે જમીન-આસમાનનો ફરક છે અને યુવા ખેલાડીઓને પોતાની રમત વિકસાવવા માટે પૂરતો સમય આપવો જોઈએ.
15 વર્ષીય વૈભવ સૂર્યવંશીએ IPLમાં પોતાની આક્રમક બેટિંગથી બધાનું ધ્યાન ખેંચ્યું હતું. જોકે ભારત માટેની શરૂઆતની કેટલીક ઇનિંગ્સમાં તે મોટી અસર છોડી શક્યો નહોતો. ઇંગ્લેન્ડ સામેની શરૂઆતની ત્રણ ઇનિંગ્સમાં તેણે 14, 13 અને 15 રન બનાવ્યા હતા. ત્યારબાદ ઝિમ્બાબ્વે સામેની ટી-20 શ્રેણીમાં તેણે શાનદાર વાપસી કરતાં 50, 20 અને 81 રનની ઇનિંગ્સ રમી પોતાની પ્રતિભાનો પરિચય આપ્યો હતો.
રહાણેએ એક પોડકાસ્ટમાં કહ્યું કે વૈભવ હજુ ખૂબ નાનો છે અને તેના પર અત્યારે જ ટેસ્ટ ક્રિકેટ કે લાંબા કરિયરની અપેક્ષાઓનો ભાર મૂકવો યોગ્ય નથી. તેના અનુસાર આંતરરાષ્ટ્રીય ક્રિકેટમાં સફળ થવા માટે ટેક્નિક, ધીરજ, માનસિક મજબૂતી અને સતત પ્રદર્શન જરૂરી હોય છે, જ્યારે IPLનું ફોર્મેટ અને દબાણ અલગ પ્રકારનું હોય છે.
રહાણેએ વધુમાં ઉમેર્યું કે વૈભવ પાસે અસાધારણ પ્રતિભા છે અને જો તેને યોગ્ય માર્ગદર્શન તથા સમય મળશે તો તે ભવિષ્યમાં ભારતીય ક્રિકેટ માટે મોટો ખેલાડી બની શકે છે. તેણે ક્રિકેટપ્રેમીઓને પણ અપીલ કરી કે યુવા ખેલાડીઓનું મૂલ્યાંકન થોડા મેચોના આધારે ન કરવું જોઈએ. સતત અનુભવ અને આત્મવિશ્વાસથી જ કોઈ ખેલાડી આંતરરાષ્ટ્રીય સ્તરે પોતાની ઓળખ બનાવી શકે છે. રહાણેના આ નિવેદન બાદ ક્રિકેટ જગતમાં ફરી એકવાર યુવા પ્રતિભાઓને ધીરજપૂર્વક તૈયાર કરવાની ચર્ચા તેજ બની છે.
वैभव सूर्यवंशी को अजिंक्य रहाणे ने दी चेतावनी, कहा- आईपीएल और इंटरनेशनल क्रिकेट में काफी फर्क हैhttps://t.co/8071zg3Fhz
— India TV (@indiatvnews) August 5, 2026