દુલિપ ટ્રોફી 2026ના ક્વાર્ટર ફાઈનલમાં ઈસ્ટ ઝોને શાનદાર પ્રદર્શન કરીને નોર્થ ઈસ્ટ ઝોનને એક ઈનિંગ્સ અને 210 રનના વિશાળ અંતરથી હરાવ્યું છે. આ જીત સાથે ઈશાન કિશનની આગેવાનીવાળી ઈસ્ટ ઝોનની ટીમે સેમિફાઈનલમાં સ્થાન નિશ્ચિત કરી લીધું છે. બેંગલુરુના BCCI સેન્ટર ઓફ એક્સેલન્સ ગ્રાઉન્ડ પર રમાયેલો આ મુકાબલો માત્ર ત્રણ દિવસમાં જ પૂરો થઈ ગયો.
મેચમાં ઈસ્ટ ઝોને પ્રથમ બેટિંગ કરતા 467 રનનો વિશાળ સ્કોર ઊભો કર્યો હતો. ટીમ તરફથી ઓલરાઉન્ડર શાહબાઝ અહમદે શાનદાર બેટિંગનું પ્રદર્શન કર્યું. સાતમા ક્રમે ઉતરેલા શાહબાઝે 167 રનની જબરદસ્ત ઈનિંગ્સ રમી, જેમાં 17 ચોગ્ગા અને 4 છગ્ગાનો સમાવેશ થાય છે. તેના આ શાનદાર પ્રદર્શન માટે તેને પ્લેયર ઓફ ધ મેચ જાહેર કરવામાં આવ્યા.
ઈસ્ટ ઝોનના વિશાળ સ્કોરના જવાબમાં નોર્થ ઈસ્ટ ઝોનની ટીમ પ્રથમ ઈનિંગ્સમાં માત્ર 111 રનમાં ઓલઆઉટ થઈ ગઈ હતી. ત્યારબાદ ઈસ્ટ ઝોને ફોલોઓન આપ્યું. બીજી ઈનિંગ્સમાં પણ નોર્થ ઈસ્ટ ઝોનના બેટ્સમેનો ખાસ પ્રતિકાર કરી શક્યા નહીં અને આખી ટીમ 146 રનમાં સમેટાઈ ગઈ. આ રીતે ઈસ્ટ ઝોને એક ઈનિંગ્સ અને 210 રનથી મેચ જીતી લીધી.
બોલિંગમાં અનુકૂલ રોય ઈસ્ટ ઝોન માટે સૌથી સફળ રહ્યા. ડાબોડી સ્પિનરે બીજી ઈનિંગ્સમાં પાંચ વિકેટ ઝડપી અને નોર્થ ઈસ્ટ ઝોનની બેટિંગ લાઈનઅપને તોડી નાખી. વૈભવ સૂર્યવંશીએ પણ બે વિકેટ ઝડપી ટીમની જીતમાં યોગદાન આપ્યું. અનુભવી ઝડપી બોલર મોહમ્મદ શમીને જોકે મેચમાં વિકેટ મળી નહોતી.
હવે ઈસ્ટ ઝોન સેમિફાઈનલમાં સેન્ટ્રલ ઝોન સામે ટકરાશે. સેમિફાઈનલ મુકાબલો 30 ઓગસ્ટથી શરૂ થવાનો છે. ઈસ્ટ ઝોનના બેટિંગ અને બોલિંગ બંને વિભાગના આ પ્રભાવશાળી પ્રદર્શન બાદ ટીમનું મનોબળ ચોક્કસપણે ઊંચું હશે.
EAST ZONE WON BY 210 RUNS vs NORTH EAST ZONE.
Ishan Kishan’s side enters in semifinals of Duleep Trophy 2026. 🇮🇳 pic.twitter.com/tfv8Hoe4d4
— Maina Singh (@Maina_Singhx77) August 25, 2026