મેજર લીગ ક્રિકેટ (MLC) 2026ની એલિમિનેટર મેચમાં વોશિંગ્ટન ફ્રીડમે ટી20 ક્રિકેટના ઇતિહાસની સૌથી યાદગાર જીતમાંની એક નોંધાવી છે. ટીમે MI ન્યૂયોર્ક દ્વારા અપાયેલા 267 રનના વિશાળ લક્ષ્યાંકને માત્ર 18.4 ઓવરમાં 4 વિકેટે હાંસલ કરીને ઇતિહાસ રચ્યો. આ જીત સાથે વોશિંગ્ટન ફ્રીડમે માત્ર ટૂર્નામેન્ટમાં પોતાનો સફર જ જાળવી રાખ્યો નથી, પરંતુ ટી20 ક્રિકેટમાં સૌથી સફળ રનચેઝનો નવો વિશ્વવિક્રમ પણ પોતાના નામે કર્યો છે.
પ્રથમ બેટિંગ કરતા MI ન્યૂયોર્કે 20 ઓવરમાં 9 વિકેટે 266 રન ફટકાર્યા હતા. ટીમ માટે કેપ્ટન નિકોલસ પૂરણે માત્ર 33 બોલમાં 106 રનની વિસ્ફોટક સદી ફટકારી હતી. ઉપરાંત ક્વિન્ટન ડી કોકે ઝડપી અડધી સદી નોંધાવી હતી, જ્યારે કિરોન પોલાર્ડે પણ તોફાની બેટિંગ કરીને ટીમને વિશાળ સ્કોર સુધી પહોંચાડી હતી.
267 રનના લક્ષ્યાંકનો પીછો કરવા ઉતરેલી વોશિંગ્ટન ફ્રીડમ તરફથી સ્ટીવ સ્મિથ અને એન્ડ્રિઝ ગોસે શાનદાર બેટિંગનું પ્રદર્શન કર્યું. બંનેએ બીજી વિકેટ માટે 241 રનની ઐતિહાસિક ભાગીદારી નોંધાવી હતી. સ્ટીવ સ્મિથે માત્ર 48 બોલમાં 110 રનની ધમાકેદાર ઇનિંગ્સ રમી, જ્યારે એન્ડ્રિઝ ગોસે પણ અણનમ સદી ફટકારીને ટીમને જીત સુધી પહોંચાડી હતી. તેમની આક્રમક બેટિંગ સામે MI ન્યૂયોર્કના બોલરો સંપૂર્ણપણે નિષ્ફળ રહ્યા હતા.
આ મેચમાં અનેક નવા રેકોર્ડ બન્યા. ટી20 ક્રિકેટના ઇતિહાસમાં પ્રથમ વખત એક જ મેચમાં ત્રણ ખેલાડીઓએ સદી ફટકારી હતી. ઉપરાંત બંને ટીમોએ મળીને કુલ 51 છગ્ગા ફટકાર્યા, જે પણ એક અનોખો રેકોર્ડ છે. વોશિંગ્ટન ફ્રીડમની આ ઐતિહાસિક જીતને મેજર લીગ ક્રિકેટના ઇતિહાસની સૌથી યાદગાર મેચોમાં સ્થાન મળ્યું છે.
🚨 WASHINGTON BREAKS PUNJAB KINGS RECORDS🚨
– Washington Freedom chased down a 267 runs target against MI New York.
– Washington Freedom breaks Punjab Kings 264 runs chase against Delhi Capitals in 2026 IPL. pic.twitter.com/pWook4ITWD
— Cricket Central (@CricketCentrl) July 16, 2026