ભારતીય ક્રિકેટના યુવા સ્ટાર વૈભવ સૂર્યવંશીને વધુ એક મોટી સિદ્ધિ મળી છે. દુલીપ ટ્રોફી 2026 માટે જાહેર કરાયેલી ઈસ્ટ ઝોનની 15 સભ્યોની ટીમમાં વિકેટકીપર-બેટ્સમેન ઈશાન કિશનને કેપ્ટન બનાવવામાં આવ્યો છે, જ્યારે માત્ર 15 વર્ષીય વૈભવ સૂર્યવંશીને ઉપકપ્તાન તરીકે પસંદ કરવામાં આવ્યો છે. તાજેતરમાં ઝિમ્બાબ્વે પ્રવાસ દરમિયાન શાનદાર પ્રદર્શન કર્યા બાદ વૈભવને આ મહત્વપૂર્ણ જવાબદારી સોંપવામાં આવી છે.
વૈભવ સૂર્યવંશીએ છેલ્લા કેટલાક મહિનાઓમાં પોતાની આક્રમક બેટિંગ અને સતત સારા દેખાવથી સૌનું ધ્યાન ખેંચ્યું છે. ઝિમ્બાબ્વે સામેની ટી-20 શ્રેણીમાં તે ‘પ્લેયર ઓફ ધ સિરીઝ’ રહ્યો હતો. હવે તેની આ જબરદસ્ત ફોર્મને ધ્યાનમાં રાખીને ઈસ્ટ ઝોનના પસંદગીકારોએ તેને ઉપકપ્તાન તરીકે નિયુક્ત કર્યો છે. આ તેની કારકિર્દીમાં પ્રથમ વખત છે જ્યારે તેને કોઈ મોટી ડોમેસ્ટિક ટીમમાં નેતૃત્વની જવાબદારી મળી છે.
દુલીપ ટ્રોફી 2026ની શરૂઆત 23 ઓગસ્ટથી બેંગલુરુમાં થશે. આ ટુર્નામેન્ટ ભારતીય ડોમેસ્ટિક ક્રિકેટની સૌથી પ્રતિષ્ઠિત રેડ-બોલ સ્પર્ધાઓમાંની એક માનવામાં આવે છે અને અહીંનું પ્રદર્શન ખેલાડીઓ માટે ટીમ ઈન્ડિયામાં વાપસી અથવા સ્થાન મજબૂત કરવાની મોટી તક બની શકે છે.
ઈસ્ટ ઝોનની ટીમમાં અનુભવી બેટ્સમેન અભિમન્યુ ઈશ્વરન, ઝડપી બોલર મોહમ્મદ શમી, મુકેશ કુમાર, શાહબાઝ અહમદ અને કુમાર કુશાગ્રા જેવા ખેલાડીઓનો પણ સમાવેશ કરવામાં આવ્યો છે. જોકે રિયાન પરાગ અને આકાશ દીપને પુનર્વસન પ્રક્રિયાને કારણે ટીમમાં સ્થાન મળ્યું નથી.
ઈશાન કિશનના અનુભવ અને વૈભવ સૂર્યવંશીના યુવા જુસ્સા સાથે ઈસ્ટ ઝોન આ વખતે દુલીપ ટ્રોફીમાં મજબૂત દાવેદાર તરીકે ઉતરશે. ખાસ કરીને વૈભવ માટે આ ટુર્નામેન્ટ પોતાની લીડરશિપ ક્ષમતા અને લાંબા ફોર્મેટમાં પ્રતિભા સાબિત કરવાની સુવર્ણ તક બની રહેશે.
Ishan Kishan East Zone- CAPTAIN
Vaibhav Sooryavanshi East Zone- VICE CAPTAIN#Cricket #TeamIndia pic.twitter.com/gJEzuOcueM— CREX (@Crex_live) July 29, 2026