ICC પુરુષ T20 વર્લ્ડ કપ સબ-રીજનલ આફ્રિકા ક્વોલિફાયર ગ્રુપ-Aમાં બોત્સવાનાના ઝડપી બોલર નબિલ માસ્ટરએ એવી ઘાતક બોલિંગ કરી કે T20 ઇન્ટરનેશનલ ક્રિકેટમાં નવો વિશ્વ રેકોર્ડ બની ગયો. માલી સામે રમાયેલા મુકાબલામાં નબિલ માસ્ટરે માત્ર 2 રન આપીને 6 વિકેટ ઝડપી અને પુરુષ T20I ઈતિહાસનું સૌથી વધુ ઇકોનોમિકલ 6 વિકેટ હોલ નોંધાવ્યું.
નબિલ માસ્ટરની આગ જેવી બોલિંગ સામે માલીની આખી ટીમ ફક્ત 24 રનમાં ઓલઆઉટ થઈ ગઈ. બોત્સવાનાએ આ નાનો લક્ષ્યાંક માત્ર 2.2 ઓવરમાં જ હાંસલ કરીને 10 વિકેટે એકતરફી જીત મેળવી. આ મેચ બાદ નબિલનું નામ સમગ્ર ક્રિકેટ જગતમાં ચર્ચાનો વિષય બની ગયું છે.
નબિલના બોલિંગ આંકડા હતા – 2.4 ઓવર, 1 મેઈડન, માત્ર 2 રન અને 6 વિકેટ. તેમની 16 બોલની સ્પેલમાં 14 ડોટ બોલ હતી. ખાસ વાત એ રહી કે છેલ્લી 10 બોલમાં તેમણે માત્ર 1 રન આપ્યો અને 4 વિકેટ ઝડપી. તેમની બોલિંગ સિક્વન્સ હતી – W,W,0,0,0,W,W,1,W,W જેવી વિનાશક લયથી ભરેલી.
મેચ દરમિયાન નબિલ છઠ્ઠા ઓવરમાં બોલિંગ કરવા આવ્યા ત્યારે માલીનો સ્કોર 3 વિકેટે 14 રન હતો. પ્રથમ ઓવરમાં માત્ર 1 રન આપ્યા બાદ બીજા ઓવરમાં સતત બે બોલ પર વિકેટ લઈને વિરોધી ટીમની કમર તોડી નાખી. અંતિમ ઓવરમાં ફરી ત્રણ વિકેટ લઈને માલીની ઇનિંગ્સ 24 રનમાં સમેટી દીધી.
આ પહેલાં પુરુષ T20Iમાં સૌથી ઓછા રનમાં 6 વિકેટ લેવાનો રેકોર્ડ સિંગાપુરના હર્ષ ભારદ્વાજના નામે હતો, જેમણે 3 રનમાં 6 વિકેટ લીધી હતી. હવે નબિલ માસ્ટરે તે રેકોર્ડ તોડી ઈતિહાસ રચી દીધો.
𝟮 𝗙𝗢𝗥 𝟮! 𝗕𝗢𝗧𝗦𝗪𝗔𝗡𝗔 𝗠𝗔𝗥𝗖𝗛 𝗢𝗡! 🇧🇼🔥
Flawless. Dominant. Unbeaten. Hosts Botswana secure a clinical 10wkt victory over Mali 🌟 Player of the Match: Nabil Master 📈 2 games, 2 wins. The momentum is real! 🎥 LIVE on https://t.co/cfx4U40LSL#t20WCWQ #BotswanaCricket pic.twitter.com/xK4pjeSksc
— Cricket360 (@Cric360Africa) May 24, 2026