ભારતના સ્ટાર ડાબોડી ફાસ્ટ બોલર અર્શદીપ સિંહે ન્યૂઝીલેન્ડ સામેની છેલ્લી T20 મેચમાં પાંચ વિકેટ લઈને એક અનોખો પરંતુ અનિચ્છનીય રેકોર્ડ બનાવ્યો છે. આ મેચમાં અર્શદીપે વિકેટ તો લીધી પણ ઘણા રન પણ આપ્યા. આમ છતાં ભારતે મેચમાં મોટી જીત નોંધાવી હતી.
ભારત અને ન્યુઝીલેન્ડ વચ્ચે T20 શ્રેણીની પાંચમી અને છેલ્લી મેચ 31 જાન્યુઆરી શનિવારના રોજ તિરુવનંતપુરમમાં રમાઈ હતી. આ મેચમાં ભારતીય ફાસ્ટ બોલર અર્શદીપ સિંહે T20 ઈન્ટરનેશનલમાં પોતાની પ્રથમ પાંચ વિકેટ લઈને ઈતિહાસ રચ્યો હતો, પરંતુ આ રેકોર્ડ તેના માટે ખાસ નહોતો. અર્શદીપ T20 આંતરરાષ્ટ્રીય ક્રિકેટમાં પાંચ વિકેટ લેનાર અને 50 કે તેથી વધુ રન આપનાર પ્રથમ બોલર બન્યો.
અર્શદીપે પોતાની ચાર ઓવરમાં 51 રન આપીને 5 વિકેટ લીધી હતી. આ પ્રદર્શન સાથે અર્શદીપે T20 આંતરરાષ્ટ્રીય ક્રિકેટમાં સૌથી મોંઘી પાંચ વિકેટ લેવાનો રેકોર્ડ બનાવ્યો. આ પહેલા આ રેકોર્ડ વેસ્ટ ઈન્ડિઝના ફાસ્ટ બોલર અલ્ઝારી જોસેફના નામે હતો, જેણે 2023માં દક્ષિણ આફ્રિકા સામે 40 રન આપીને પાંચ વિકેટ લીધી હતી.