વર્ષ 2026ના પ્રથમ છ મહિનામાં ભારતમાં OTT પ્લેટફોર્મ પર ક્રિકેટનો જબરદસ્ત દબદબો જોવા મળ્યો છે. ઓરમેક્સ મીડિયાની ‘ધ ઈન્ડિયા OTT વૉચલિસ્ટ: જાન્યુઆરી-જૂન 2026’ રિપોર્ટ અનુસાર, ICC મેન્સ T20 વર્લ્ડ કપ 2026 દેશનો સૌથી વધુ જોવાયેલો OTT કન્ટેન્ટ રહ્યો છે. જ્યારે ઈન્ડિયન પ્રીમિયર લીગ (IPL) 2026 બીજા ક્રમે રહી છે. આ ઉપરાંત ભારત અને ન્યૂઝીલેન્ડ વચ્ચે રમાયેલી ક્રિકેટ શ્રેણીએ પણ ટોપ જોવાયેલા કન્ટેન્ટમાં સ્થાન મેળવ્યું છે.
રિપોર્ટ દર્શાવે છે કે રમતગમતના ક્ષેત્રમાં ક્રિકેટ હજુ પણ ભારતીય દર્શકોની પ્રથમ પસંદગી છે. OTT પ્લેટફોર્મ પર લાખો દર્શકોએ T20 વર્લ્ડ કપ અને IPLની મેચો ઉત્સાહપૂર્વક નિહાળી હતી, જેના કારણે બંને ટૂર્નામેન્ટ્સે દર્શકોના રેકોર્ડ બનાવ્યા.
મનોરંજન કેટેગરીમાં ‘ઈન્ડિયાઝ ગોટ લેટન્ટ સીઝન 2’ સૌથી વધુ જોવાયેલો શો રહ્યો. ત્યારબાદ હિન્દી ફિલ્મ ‘ધુરંધર’ બીજા ક્રમે રહી. હિન્દી વેબ સિરીઝમાં મેડ ઇન ઇન્ડિયા: અ ટાઇટન સ્ટોરી’એ પ્રથમ સ્થાન મેળવ્યું, જ્યારે ‘ચિરૈયા’ અને તસ્કરી: ધ સ્મગલર્સ વેબ’ને પણ દર્શકોનો સારો પ્રતિસાદ મળ્યો.
ટીવી કન્ટેન્ટમાં ‘નાગિન સીઝન 7’ સૌથી વધુ જોવાયેલો ફિક્શન શો રહ્યો, જ્યારે ‘તારક મહેતા કા ઉલ્ટા ચશ્મા’ અને ‘અનુપમા’ પણ લોકપ્રિય રહ્યા. બિન-હિન્દી કન્ટેન્ટમાં ફિલ્મ ‘ધ રાજાસાબ’ અને પંજાબી વેબ સિરીઝ ‘કોહર્રા સીઝન 2’એ પોતાની શ્રેણીમાં ટોચનું સ્થાન મેળવ્યું. આંતરરાષ્ટ્રીય કન્ટેન્ટમાં વેબ સિરીઝ ‘ઓફ કેમ્પસ’ અને ફિલ્મ ‘અવતાર: ફાયર એન્ડ એશ’ સૌથી વધુ જોવાઈ.
ઓરમેક્સ મીડિયાએ જણાવ્યું કે આ રિપોર્ટ દર અઠવાડિયે દેશભરના 3,000થી વધુ લોકો પાસેથી મેળવાયેલા ડેટાના આધારે તૈયાર કરવામાં આવ્યો છે. તેમાં માત્ર એવા દર્શકોને સામેલ કરવામાં આવ્યા હતા જેમણે કોઈ મેચ, ફિલ્મ અથવા શોને ઓછામાં ઓછા 30 મિનિટ સુધી જોયો હતો. આ આંકડાઓ સ્પષ્ટ કરે છે કે ભારતમાં OTT પ્લેટફોર્મ પર ક્રિકેટનું આકર્ષણ હજુ પણ સૌથી મજબૂત છે.