ઈંગ્લેન્ડ ક્રિકેટ ટીમે બર્મિંગહામ ટેસ્ટમાં ભારત સામે મોટી જીત મેળવીને ઈતિહાસ રચ્યો હતો. ભારતે મેચના ચોથા દિવસે ભારત સામે 378 રનનો ટાર્ગેટ રાખ્યો હતો, જેને ટીમે પાંચમા દિવસે માત્ર 3 વિકેટના નુકસાને હાંસલ કરી લીધો હતો.
ટેસ્ટ ક્રિકેટમાં સૌથી મોટા લક્ષ્યનો પીછો કરતી વખતે ઈંગ્લેન્ડની ટીમે મેળવેલી આ જીત છે. જો રૂટે અણનમ 142 રન બનાવ્યા હતા જ્યારે જોની બેયરસ્ટોએ અણનમ 114 રન બનાવી ટીમને જીત અપાવી હતી.
ઈંગ્લેન્ડ સામેની બર્મિંગહામ ટેસ્ટમાં ભારતે ત્રણ દિવસ સુધી મેચ પકડી રાખી હતી પરંતુ અંતે બધુ જ સરકી ગયું હતું. પ્રથમ દાવમાં 416 રન બનાવ્યા બાદ ટીમ ઈન્ડિયાએ ઈંગ્લેન્ડને પ્રથમ દાવમાં 284 રનમાં સમેટીને 132 રનની લીડ મેળવી હતી. બીજી ઈનિંગમાં 245 રનમાં ઓલઆઉટ થયા બાદ ઈંગ્લેન્ડને 378 રનનો ટાર્ગેટ મળ્યો હતો. ભારતીય બોલિંગને ધ્યાનમાં રાખીને આ જીત મુશ્કેલ માનવામાં આવી રહી હતી પરંતુ ઇંગ્લિશ બેટ્સમેનોએ પલટો કર્યો હતો.
ભારત સામે 378 રનનો પીછો કરીને ઈંગ્લેન્ડે ટેસ્ટમાં તેના સૌથી મોટા લક્ષ્યનો પીછો કરતા જીતનો રેકોર્ડ તોડ્યો હતો. 2019ની હેડિંગલી ટેસ્ટમાં ઈંગ્લેન્ડે 359 રનનો પીછો કર્યો હતો અને 1 વિકેટથી જીત મેળવી હતી. હવે ટીમે બર્મિંગહામમાં ભારત સામે 378 રનનો નવો રેકોર્ડ બનાવ્યો છે. 1928 માં, ઇંગ્લિશ ટીમે 332 રનનો લક્ષ્યાંક હાંસલ કર્યો હતો જે હવે તેમના દ્વારા પ્રાપ્ત કરવામાં આવેલો ત્રીજો સૌથી વધુ લક્ષ્ય બની ગયો છે.