ભારત અને શ્રીલંકા વચ્ચે ગાલે ઈન્ટરનેશનલ ક્રિકેટ સ્ટેડિયમમાં રમાઈ રહેલી પ્રથમ ટેસ્ટ મેચમાં ટીમ ઈન્ડિયાએ પ્રથમ દાવમાં 462 રનનો મજબૂત સ્કોર નોંધાવ્યો છે. વરસાદથી પ્રભાવિત આ મેચમાં ભારતે બેટિંગ બાદ હવે શ્રીલંકા પર દબાણ વધારી દીધું છે. ભારતની આખી ટીમ ત્રીજા દિવસના પ્રથમ જ ઓવરમાં 462 રને ઓલઆઉટ થઈ ગઈ હતી.
ભારત તરફથી દેવદત્ત પડિક્કલે શાનદાર બેટિંગનું પ્રદર્શન કરતાં 167 રનની અદભૂત ઇનિંગ રમી હતી. પડિક્કલે 230 બોલનો સામનો કરીને 15 ચોગ્ગા અને એક છગ્ગો ફટકાર્યો હતો. તેમની સદી અને લાંબી ઇનિંગે ભારતને મોટા સ્કોર સુધી પહોંચાડવામાં મહત્વની ભૂમિકા ભજવી હતી.
ભારતની 462 રનની ઇનિંગ બાદ શ્રીલંકા મુશ્કેલીમાં જોવા મળી રહ્યું છે. ફોલોઑનથી બચવા માટે શ્રીલંકાને ઓછામાં ઓછા 262 રન બનાવવા પડશે. જો શ્રીલંકાની ટીમ 262 રન સુધી પહોંચ્યા વગર ઓલઆઉટ થાય છે, તો ભારતીય કેપ્ટન શુભમન ગિલ પાસે શ્રીલંકાને ફરી બેટિંગ માટે બોલાવવાનો વિકલ્પ રહેશે.
શ્રીલંકાની શરૂઆત પણ ખાસ રહી નથી. ત્રીજા દિવસના લંચ સુધી યજમાન ટીમે 5 વિકેટ ગુમાવીને માત્ર 99 રન બનાવ્યા હતા. ખાસ વાત એ છે કે શ્રીલંકાની શરૂઆતની પાંચ વિકેટમાંથી ચાર વિકેટ ભારતીય સ્પિન બોલરોએ ઝડપી હતી. આ દર્શાવે છે કે જેમ જેમ મેચ આગળ વધી રહી છે તેમ ગાલેની પિચ સ્પિનરોને મદદરૂપ બની રહી છે.
મેચના પ્રથમ બે દિવસમાં વરસાદના કારણે માત્ર 116 ઓવરનો જ ખેલ થઈ શક્યો હતો, જ્યારે 180 ઓવરનો રમતનો કાર્યક્રમ હતો. આગામી દિવસોમાં પણ વરસાદની સંભાવના હોવાથી ભારત માટે શ્રીલંકાને ઝડપથી ઓલઆઉટ કરીને ફોલોઑન આપવાનો વિકલ્પ મહત્વનો બની શકે છે.
હવે ભારતીય બોલરોનું લક્ષ્ય શ્રીલંકાને 262 રન પહેલાં રોકવાનું રહેશે. જો ભારત આમાં સફળ થાય છે, તો મેચમાં તેની જીતની શક્યતાઓ વધુ મજબૂત બની શકે છે.
India reached 460/9 at stumps on Day 2 of the first Test against Sri Lanka in Galle.https://t.co/tvKfEaAoKh
— CricketTimes.com (@CricketTimesHQ) August 16, 2026