ભારતીય ટેસ્ટ ટીમના કેપ્ટન વિરાટ કોહલીએ ટીમના એક ખેલાડી વિશે મોટી ભવિષ્યવાણી કરી છે. કોહલીનું માનવું છે કે ટીમનો સ્પિન ઓલરાઉન્ડર અક્ષર પટેલ જો તેની ફિટનેસ પર સંપૂર્ણ ધ્યાન આપે તો તે લાંબા સમય સુધી ભારત માટે ક્રિકેટ રમી શકે છે.
તમને જણાવી દઈએ કે મુંબઈ ટેસ્ટ મેચમાં અક્ષર પટેલે ટીમ માટે માત્ર બોલથી જ નહીં પરંતુ બેટથી પણ સારું યોગદાન આપ્યું હતું. તેણે પ્રથમ દાવમાં 52 રનની મહત્વની ઈનિંગ રમી હતી જ્યારે બીજી ઈનિંગમાં તેણે 26 બોલમાં 4 છગ્ગા અને 3 ચોગ્ગાની મદદથી અણનમ 41 રન બનાવ્યા હતા.
ન્યુઝીલેન્ડ સામેની બે મેચની ટેસ્ટ શ્રેણીમાં 1-0થી જીત નોંધાવ્યા બાદ, વિરાટ કોહલીએ એક પ્રેસ કોન્ફરન્સમાં જણાવ્યું હતું કે અક્ષર સ્પષ્ટપણે એક ઓલરાઉન્ડ ક્રિકેટર છે અને તેની કુશળતા કોઈપણ ટીમને શ્રેષ્ઠ સંતુલન પ્રદાન કરે છે. તેની ક્ષમતાના કારણે તે લાંબા સમયથી ટી-20 અને ટેસ્ટ ક્રિકેટમાં તક મળે ત્યારે સારું પ્રદર્શન કરી રહ્યો છે. સૌથી સારી વાત એ છે કે તે પોતાની રમતને ફોર્મેટની જરૂરિયાત પ્રમાણે અપનાવી રહ્યો છે. મને લાગે છે કે આ એક સારો સંકેત છે અને જો તે પોતાનું ફિટનેસ લેવલ જાળવી શકે છે અને તેની રમત પર કામ કરવાનું ચાલુ રાખે છે, તો તે લાંબા સમય સુધી ભારત માટે રમવાની ક્ષમતા ધરાવે છે. મૂળભૂત રીતે આજના ક્રિકેટમાં પણ આ સમયની જરૂરિયાત છે.
વિરાટ કોહલીએ વધુમાં કહ્યું કે જો તમે તમારું ફિટનેસ લેવલ જાળવી શકતા નથી તો સારું પ્રદર્શન કરવું વધુ મુશ્કેલ બની જાય છે. અક્ષર અત્યારે એક અદ્ભુત તબક્કામાંથી પસાર થઈ રહ્યો છે અને હું તેને સફળતાની શુભેચ્છા પાઠવું છું. મને આશા છે કે તે લાંબા સમય સુધી રમવા માટે ફિટ અને ભૂખ્યો રહેશે.