‘લેડી સેહવાગ’ શેફાલી વર્માએ ડેબ્યૂ ટેસ્ટમાં ઇતિહાસ રચ્યો, 26 વર્ષ જુનો રેકોર્ડ તોડ્યો

ડેબ્યુ ટેસ્ટની ઇનિંગમાં સૌથી વધુ રન બનાવવાનો રેકોર્ડ સી કૌલના નામે હતો…

ભારતીય યુવા ખેલાડી શેફાલી વર્માએ બ્રિસ્ટોલમાં ભારત અને ઇંગ્લેન્ડની મહિલા ક્રિકેટ ટીમો વચ્ચેની ટેસ્ટના બીજા દિવસે ઇતિહાસ રચ્યો હતો. ફક્ત 17 વર્ષની શેફાલીએ 152 બોલમાં 96 રન બનાવીને ભારતની પ્રથમ ઇનિંગ્સમાં 26 વર્ષ જુનો રેકોર્ડ તોડ્યો હતો. તે જ સમયે, તે ભારતીય મહિલા ક્રિકેટર દ્વારા ડેબ્યૂ ટેસ્ટમાં ભારત માટે સૌથી વધુ રન બનાવનાર ખેલાડી બની છે.

આપને જણાવી દઇએ કે શેફાલી પહેલા ભારત તરફથી ડેબ્યુ ટેસ્ટની ઇનિંગમાં સૌથી વધુ રન બનાવવાનો રેકોર્ડ સી કૌલના નામે હતો. ફેબ્રુઆરી 1995 માં તેણે તેની પ્રથમ ટેસ્ટમાં 75 રન બનાવ્યા હતા. હવે શેફાલીએ કૌલનો આ રેકોર્ડ તોડીને પોતાનું નામ બનાવ્યું છે.

બીજા દિવસની રમત બાદ શેફાલીએ કહ્યું કે, “સદી ખોવાઈ જવાનું ખરાબ લાગે તે સ્વાભાવિક છે, મને હંમેશા તેનો પસ્તાવો થશે, પરંતુ આ ઇનિંગ્સ મને આગામી મેચોમાં ઘણો વિશ્વાસ આપશે.”