ઇંગ્લેન્ડ ક્રિકેટમાં મોટા ફેરફારોની ચર્ચા વચ્ચે ભારતીય દિગ્ગજ અને પૂર્વ મુખ્ય કોચ રાહુલ દ્રવિડનું નામ ઇંગ્લેન્ડની ટેસ્ટ ટીમના નવા હેડ કોચ તરીકે જોરશોરથી ચર્ચામાં આવ્યું છે. બ્રેન્ડન મેકકલમને ટેસ્ટ ટીમના હેડ કોચ પદેથી હટાવ્યા બાદ ઇંગ્લેન્ડ એન્ડ વેલ્સ ક્રિકેટ બોર્ડ (ECB) નવા કોચની શોધમાં છે અને મીડિયા અહેવાલો અનુસાર દ્રવિડ સંભવિત ઉમેદવારોમાં સામેલ છે.
અહેવાલો મુજબ, ECB અનુભવી અને શાંત સ્વભાવના કોચની શોધમાં છે, જે ઇંગ્લેન્ડની ટેસ્ટ ટીમને ફરીથી મજબૂત બનાવી શકે. રાહુલ દ્રવિડે ભારતીય ટીમને 2024ના ટી20 વર્લ્ડ કપનો ખિતાબ અપાવ્યો હતો અને તેના કાર્યકાળ દરમિયાન યુવા ખેલાડીઓને પણ સફળતાપૂર્વક તૈયાર કર્યા હતા. તેની કોચિંગ શૈલી, શિસ્ત અને ટેક્નિકલ સમજણને કારણે તેઓ વિશ્વ ક્રિકેટમાં ખૂબ જ સન્માનિત માનવામાં આવે છે.
જોકે, દ્રવિડ સંપૂર્ણ સમય માટે ફરી આંતરરાષ્ટ્રીય ટીમ સાથે જોડાવા તૈયાર થશે કે નહીં તે અંગે હજુ કોઈ સત્તાવાર સ્પષ્ટતા થઈ નથી. અહેવાલોમાં એવો પણ દાવો કરવામાં આવ્યો છે કે તેઓ ફુલ-ટાઇમ જવાબદારી લેવા માટે ખાસ ઉત્સુક નથી. તેથી અંતિમ નિર્ણય હજુ બાકી છે.
રાહુલ દ્રવિડ ઉપરાંત એન્ડી ફ્લાવર અને રિચર્ડ ડોસન જેવા અનુભવી નામો પણ દાવેદારોની યાદીમાં હોવાનું કહેવાય છે. ECB આગામી દિવસોમાં નવા ટેસ્ટ હેડ કોચની જાહેરાત કરી શકે છે, કારણ કે ટીમે ટૂંક સમયમાં પાકિસ્તાન સામે ટેસ્ટ શ્રેણી રમવાની છે.
જો રાહુલ દ્રવિડ આ ઓફર સ્વીકારશે તો તે ઇંગ્લેન્ડની ટેસ્ટ ટીમના ઇતિહાસમાં સૌથી ચર્ચિત નિયુક્તિઓમાંથી એક ગણાશે. ભારતીય ક્રિકેટના દિગ્ગજ તરીકે ઓળખાતા દ્રવિડ માટે આ એક નવી અને અનોખી આંતરરાષ્ટ્રીય પડકારરૂપ તક બની શકે છે, જોકે હાલમાં આ મામલે ECB કે દ્રવિડ તરફથી કોઈ સત્તાવાર જાહેરાત કરવામાં આવી નથી.