રોસ ટેલરે તેની કારકિર્દીની છેલ્લી ટેસ્ટમાં ડેનિયલ વેટોરીના રેકોર્ડની બરાબરી કરી

બાંગ્લાદેશ અને ન્યુઝીલેન્ડ વચ્ચે બીજી ટેસ્ટ મેચ ક્રાઈસ્ટચર્ચમાં રમાઈ રહી છે. અનુભવી કિવી ખેલાડી રોસ ટેલરની કારકિર્દીની આ છેલ્લી ટેસ્ટ મેચ છે.

તેણે આ સમયગાળા દરમિયાન વિશેષ સ્થાન હાંસલ કર્યું અને ન્યૂઝીલેન્ડ માટે સૌથી વધુ ટેસ્ટ રમવાના ડેનિયલ વેટોરીના રેકોર્ડની બરાબરી કરી લીધી. ટેલરની આ 112મી ટેસ્ટ મેચ છે. વિટોરીએ પણ આટલી જ મેચોમાં કિવી ટીમનું પ્રતિનિધિત્વ કર્યું છે. આ બંને બાદ આ યાદીમાં પૂર્વ કેપ્ટન સ્ટીફન ફ્લેમિંગનું નામ આવે છે. તેણે 111 ટેસ્ટ મેચ રમી છે. આ સાથે જ બ્રેન્ડન મેક્કુલમે 101 મેચ રમી છે.

ન્યુઝીલેન્ડ અને બાંગ્લાદેશ વચ્ચે ચાલી રહેલી ટેસ્ટ રોસ ટેલરની છેલ્લી ટેસ્ટ મેચ છે. તેણે સિરીઝની શરૂઆત પહેલા નિવૃત્તિની જાહેરાત કરી દીધી હતી. 30 ડિસેમ્બર 2021ના રોજ, ટેલરે પુષ્ટિ કરી કે તે આ ઉનાળાના અંતમાં ઓસ્ટ્રેલિયા અને નેધરલેન્ડ સામેની ODI પહેલા બાંગ્લાદેશ સામે તેની છેલ્લી ટેસ્ટ શ્રેણી રમશે. ટેલરે કહ્યું છે કે તે આ સીઝન બાદ આંતરરાષ્ટ્રીય ક્રિકેટમાંથી નિવૃત્તિ લઈ લેશે. આ સાથે તેની 16 વર્ષની લાંબી કારકિર્દીનો અંત આવશે.

તમને જણાવી દઈએ કે બાંગ્લાદેશની ટીમ સિરીઝમાં 1-0થી આગળ છે. પ્રથમ ટેસ્ટમાં યજમાન ટીમને આઠ વિકેટે હારનો સામનો કરવો પડ્યો હતો. દરમિયાન બીજી ટેસ્ટના પ્રથમ દિવસે કિવી ટીમ મજબૂત સ્થિતિમાં જોવા મળી રહી છે. ટીમ મોટા સ્કોર તરફ આગળ વધી છે. દિવસની રમતના અંતે ટીમે એક વિકેટના નુકસાને 349 રન બનાવી લીધા હતા. કેપ્ટન ટોમ લાથમ 186 અને ડ્વેન કોનવે 99 રને ક્રિઝ પર ઉભા છે. વિલ યંગ 54 રન બનાવીને આઉટ થયો હતો.