ભારત અને શ્રીલંકા વચ્ચે રમાઈ રહેલી ટેસ્ટ સિરીઝની બીજી મેચ પહેલાં ટીમ ઈન્ડિયાની પ્લેઇંગ-11માં મોટા ફેરફારની શક્યતા છે. કોલંબોમાં 23 ઓગસ્ટથી શરૂ થનારી બીજી ટેસ્ટમાં મધ્યપ્રદેશના 33 વર્ષીય ઓલરાઉન્ડર સારાંશ જૈનને આંતરરાષ્ટ્રીય ક્રિકેટમાં ડેબ્યૂ કરવાની તક મળી શકે છે. અહેવાલો અનુસાર ટીમ મેનેજમેન્ટ અને પસંદગીકારો સારાંશને પ્લેઇંગ-11માં સામેલ કરવા અંગે ગંભીરતાથી વિચાર કરી રહ્યા છે.
જો સારાંશ જૈનને તક મળે છે, તો અનુભવી સ્પિનર કુલદીપ યાદવને બહાર બેસવું પડી શકે છે. ગાલેમાં રમાયેલી પ્રથમ ટેસ્ટમાં ભારતે શ્રીલંકાને 165 રનથી હરાવ્યું હતું. જોકે, કુલદીપનું પ્રદર્શન અપેક્ષા પ્રમાણે રહ્યું નહોતું. તેણે સમગ્ર મેચમાં 103 રન આપીને માત્ર એક વિકેટ લીધી હતી. બીજી તરફ ડેબ્યૂ કરનાર માનવ સુથારે શાનદાર બોલિંગ કરતાં મેચમાં કુલ 10 વિકેટ ઝડપી હતી, જ્યારે રવિન્દ્ર જાડેજાએ ચાર વિકેટ પોતાના નામે કરી હતી.
સારાંશ જૈન માટે ભારત સુધી પહોંચવાનો રસ્તો સરળ રહ્યો નથી. ઈન્દોરમાં જન્મેલા સારાંશના પિતા સુબોધ જૈન પણ મધ્યપ્રદેશ માટે રણજી ટ્રોફી રમી ચૂક્યા છે. સારાંશે સ્થાનિક અને ફર્સ્ટ ક્લાસ ક્રિકેટમાં સતત સારા પ્રદર્શનના આધારે ટીમ ઈન્ડિયામાં સ્થાન બનાવ્યું છે.
2021-22ની રણજી ટ્રોફીમાં મધ્યપ્રદેશને પ્રથમ ખિતાબ અપાવવામાં સારાંશની મહત્વપૂર્ણ ભૂમિકા રહી હતી. નોકઆઉટ તબક્કામાં તેણે 13 વિકેટ ઝડપી હતી અને મુંબઈ સામેની ફાઇનલમાં 57 રનની ઉપયોગી ઇનિંગ રમી હતી. 2022-23ની સિઝનમાં તેણે 35 વિકેટ અને 360 રન બનાવ્યા હતા. ત્યારબાદ 2025ની દલીપ ટ્રોફીમાં સેન્ટ્રલ ઝોન તરફથી બે મેચમાં 16 વિકેટ લઈને તે પ્લેયર ઓફ ધ સિરીઝ બન્યો હતો.
હવે કોલંબો ટેસ્ટમાં સારાંશને ડેબ્યૂની તક મળે છે કે નહીં, તેના પર સૌની નજર રહેશે. ભારત પ્રથમ ટેસ્ટ જીતીને સિરીઝમાં 1-0થી આગળ છે અને બીજી જીત સાથે સિરીઝ પર કબજો જમાવવાનો પ્રયાસ કરશે. બીજી તરફ સારાંશ માટે આ મેચ આંતરરાષ્ટ્રીય ક્રિકેટના સપનાને સાકાર કરવાની મોટી તક બની શકે છે.
🚨 SARANSH JAIN SET FOR TEST DEBUT? 🇮🇳🔥
Saransh Jain could replace Kuldeep Yadav in India’s XI for the 2nd Test vs Sri Lanka in Colombo. 👀
🗞️ Sports Tak#INDvsSL pic.twitter.com/yZxezD58jk
— ViratKoisa Sports (@ViratKoisa18) August 19, 2026