ભારત અને શ્રીલંકા વચ્ચે ગાલેમાં રમાઈ રહેલી પ્રથમ ટેસ્ટમાં ટીમ ઈન્ડિયાએ શાનદાર પ્રદર્શન કરીને મેચ પર પોતાની પકડ મજબૂત બનાવી છે. ભારતે પ્રથમ ઇનિંગમાં 462 રનનો વિશાળ સ્કોર બનાવ્યા બાદ શ્રીલંકાની બેટિંગને શરૂઆતથી જ મુશ્કેલીમાં મૂકી દીધી. આ દરમિયાન યુવા ડાબોડી સ્પિનર માનવ સુથારે પોતાની બોલિંગથી સૌનું ધ્યાન ખેંચ્યું છે.
માનવ સુથારને કેપ્ટન શુભમન ગિલે શ્રીલંકાની ઇનિંગના આઠમા ઓવરમાં બોલિંગ સોંપી હતી. સુથારે પોતાના ટેસ્ટ કરિયરની પહેલી જ બોલ પર વિકેટ લઈને જબરદસ્ત શરૂઆત કરી. તેની ઓફ સ્ટમ્પની બહારની લંબાઈની બોલ અંદર આવી અને ત્યારબાદ ટર્ન થઈ બહાર નીકળી હતી. શ્રીલંકાના અનુભવી બેટર દિનેશ ચાંદીમાલ આ બોલને ડિફેન્ડ કરવાનો પ્રયાસ કરતા થાપ ખાઈ ગયા અને બોલ બેટના ઉપરના ભાગ તથા ગ્લોવ્સને અડકીને વિકેટકીપર ઋષભ પંતના હાથમાં ગયો. પંતે પણ શાનદાર કેચ ઝડપી લીધો.
માનવ અહીં અટક્યો નહોતો. તેણે લાહિરુ ઉદારા પાસે પણ પોતાની સ્પિનનો જાદુ ચલાવ્યો. ઉદારાએ શોર્ટ લેન્થની બોલ પર કટ શોટ રમવાનો પ્રયાસ કર્યો, પરંતુ વધારાના ઉછાળને કારણે બોલ બેટનો ઉપરનો કિનારો લઈને બેકવર્ડ પોઈન્ટ તરફ ગયો. ત્યાં યશસ્વી જયસ્વાલે શાનદાર કેચ પકડીને સુથારને બીજી સફળતા અપાવી. ઉદારા 27 રન બનાવીને પેવેલિયન પરત ફર્યો.
સુથારના આ શાનદાર સ્પેલ પહેલાં જ મોહમ્મદ સિરાજે પ્રથમ ઓવરની બીજી બોલે નિશાન ફર્નાન્ડોને આઉટ કરીને ભારતને પ્રથમ સફળતા અપાવી હતી. બીજી તરફ ભારતની પ્રથમ ઇનિંગમાં દેવદત્ત પડિક્કલે 167, કેએલ રાહુલે 82 અને ધ્રુવ જુરેલે 51 રનની મહત્વપૂર્ણ ઇનિંગ રમી હતી. ભારતે 462 રન બનાવી શ્રીલંકા પર મોટો દબાવ ઉભો કર્યો છે.
હવે ભારતીય સ્પિનરોની સામે શ્રીલંકાના બેટરો માટે મોટો પડકાર છે. માનવ સુથારની શાનદાર શરૂઆતથી ટીમ ઈન્ડિયાની જીતની આશા વધુ મજબૂત બની છે.
A wicket for Manav Suthar off the very first ball he bowled 🔥#SLvsIND #INDvsSL pic.twitter.com/2CEGQrDGgp
— Cricbuzz (@cricbuzz) August 17, 2026