ભારત અને ઓસ્ટ્રેલિયા વચ્ચેની ચાર ટેસ્ટ મેચની શ્રેણીની શરૂઆત 9 ફેબ્રુઆરીથી નાગપુરમાં રમાનાર પ્રથમ મેચથી થશે. આ ટેસ્ટ શ્રેણી ભારત માટે ઘણી રીતે ખાસ છે. આ સિરીઝ જીતીને ટીમ ઈન્ડિયા ICC ટેસ્ટ રેન્કિંગમાં પ્રથમ સ્થાન હાંસલ કરવા અને સતત બીજી વખત વર્લ્ડ ટેસ્ટ ચેમ્પિયનશિપની ફાઇનલમાં પહોંચવા ઈચ્છશે.
ભારત હાલમાં 58.93 ટકા માર્ક્સ સાથે WTC પોઈન્ટ ટેબલમાં બીજા સ્થાને છે, પરંતુ જો રોહિત શર્માની આગેવાની હેઠળનું ભારત ઓસ્ટ્રેલિયાને હરાવવામાં સફળ થાય છે, તો વિશ્વ ટેસ્ટ ચેમ્પિયનશિપની ફાઇનલમાં ભારત કાંગારૂઓ સાથે ટકરાશે તેવી સંભાવના છે. પેટ કમિન્સની ટીમ હાલમાં 75.56 ટકા માર્ક્સ સાથે ટોપ પર છે.
ઓસ્ટ્રેલિયા સામે ઘરઆંગણે ભારતના હેડ ટુ હેડ રેકોર્ડ પર નજર કરીએ તો ટીમ ઈન્ડિયાએ 50માંથી 21 મેચ જીતીને પ્રભુત્વ જમાવ્યું છે. આ દરમિયાન મુલાકાતી ટીમ 13 વખત જીતી હતી, જ્યારે 15 મેચ ડ્રો રહી હતી અને એક મેચ ટાઈ રહી હતી. ઓસ્ટ્રેલિયાની ટીમ છેલ્લે 2004માં ભારતમાં ભારતને હરાવવામાં સફળ રહી હતી, પરંતુ તે પછી ટીમ ઈન્ડિયાએ પોતાનો દબદબો બતાવ્યો અને સતત ચાર શ્રેણીમાં કાંગારૂઓને હરાવ્યા. 21મી સદીમાં બંને ટીમો વચ્ચે કુલ 6 શ્રેણી રમાઈ છે, જેમાં ભારતે ઓસ્ટ્રેલિયાને કુલ 5 વખત હરાવ્યું છે.
છેલ્લી વખત ઓસ્ટ્રેલિયાની ટીમે 2017માં ભારતનો પ્રવાસ કર્યો હતો, જે દરમિયાન વિરાટ કોહલીની આગેવાની હેઠળની ટીમ ઈન્ડિયાએ મુલાકાતીઓને 2-1થી હરાવ્યું હતું, જ્યારે એક મેચ ડ્રોમાં સમાપ્ત થઈ હતી.