તમ્મી બોમોન્ટે આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. ભારત સામે લોર્ડ્સ ખાતે રમાનારી ઐતિહાસિક એકમાત્ર મહિલા ટેસ્ટ મેચ તેની ઇંગ્લેન્ડ માટેની છેલ્લી આંતરરાષ્ટ્રીય મેચ રહેશે. આ સાથે લગભગ 17 વર્ષ લાંબી અને ગૌરવશાળી કારકિર્દીનો અંત આવશે.
35 વર્ષીય તમ્મી બોમોન્ટે 2009માં ઇંગ્લેન્ડ માટે આંતરરાષ્ટ્રીય ક્રિકેટમાં ડેબ્યૂ કર્યું હતું. ત્યારથી તેણે તમામ ફોર્મેટમાં કુલ 260 આંતરરાષ્ટ્રીય મેચ રમી છે અને મહિલા ક્રિકેટમાં ઇંગ્લેન્ડની સૌથી સફળ બેટરોમાં સ્થાન મેળવ્યું છે. વન-ડે ક્રિકેટમાં તેણે ઇંગ્લેન્ડ તરફથી સૌથી વધુ 12 સદી ફટકારી છે, જ્યારે આંતરરાષ્ટ્રીય ક્રિકેટમાં કુલ 14 સદી તેના નામે નોંધાયેલી છે.
બોમોન્ટની કારકિર્દીની સૌથી મોટી સિદ્ધિ 2017ના મહિલા વિશ્વકપમાં જોવા મળી હતી. પોતાના ઘરઆંગણે યોજાયેલા આ ટૂર્નામેન્ટમાં તેણે 410 રન બનાવી સૌથી વધુ રન બનાવનાર ખેલાડી બનવાનો ગૌરવ મેળવ્યો હતો. તેના શાનદાર પ્રદર્શન બદલ તેને ‘પ્લેયર ઓફ ધ ટૂર્નામેન્ટ’ જાહેર કરવામાં આવ્યા હતા અને ઇંગ્લેન્ડને વિશ્વકપ જીતાડવામાં તેણે મહત્વપૂર્ણ ભૂમિકા ભજવી હતી.
ટેસ્ટ ક્રિકેટમાં પણ બોમોન્ટે અનેક યાદગાર ઇનિંગ્સ રમી છે. 2023ની એશિઝ શ્રેણીમાં ઓસ્ટ્રેલિયા સામે બનાવેલા 208 રન ઇંગ્લેન્ડની મહિલા ક્રિકેટર દ્વારા ટેસ્ટમાં નોંધાયેલો સર્વોચ્ચ વ્યક્તિગત સ્કોર છે. ઉપરાંત તેઓ ઇંગ્લેન્ડ તરફથી ત્રણેય આંતરરાષ્ટ્રીય ફોર્મેટમાં સદી ફટકારનારી ગણતરીની ખેલાડીઓમાં સામેલ છે.
નિવૃત્તિ અંગે બોમોન્ટે કહ્યું કે ઇંગ્લેન્ડ માટે રમવું તેમના જીવનનું સૌથી મોટું ગૌરવ રહ્યું છે. તેણે ઉમેર્યું કે હવે નવી પેઢીને તક આપવાનો સમય આવી ગયો છે અને તેઓ ઘરેલુ ક્રિકેટમાં પોતાની કારકિર્દી ચાલુ રાખશે. ભારત સામે લોર્ડ્સમાં રમાનારી ઐતિહાસિક મહિલા ટેસ્ટ તેની આંતરરાષ્ટ્રીય સફરને ભાવુક વિદાય આપશે.
Tammy Beaumont has announced she will retire from international cricket at the end of the Test match against India. pic.twitter.com/3k9tspzDEP
— Cricbuzz (@cricbuzz) July 8, 2026