ભારતીય ટીમ અને પંજાબ કિંગ્સના ડાબોડી ઝડપી બોલર Arshdeep Singh છેલ્લા કેટલાક સમયથી સોશિયલ મીડિયા પર ભારે ચર્ચામાં છે. મેદાન પરના પ્રદર્શન કરતાં વધુ તેઓ પોતાના વિવાદો અને ટ્રોલિંગને કારણે ચર્ચામાં રહ્યા છે. હવે અર્શદીપે એક મોટું પગલું ભરતા પોતાના ઑફિશિયલ ઇન્સ્ટાગ્રામ એકાઉન્ટમાંથી 200થી વધુ પોસ્ટ્સ હટાવી દીધી અથવા આર્કાઇવ કરી દીધી છે. તેમાં Virat Kohli સાથેનો ચેમ્પિયન્સ ટ્રોફી 2025 દરમિયાનનો વાયરલ વીડિયો પણ સામેલ હોવાનું જણાવાઈ રહ્યું છે.
અર્શદીપના ઇન્સ્ટાગ્રામ પર અગાઉ સૈંકડો પોસ્ટ્સ જોવા મળતી હતી, પરંતુ હવે માત્ર 44 પોસ્ટ્સ જ બાકી રહી છે. સોશિયલ મીડિયા પર ચાહકો આ બદલાવને તાજેતરના વિવાદો અને વધતી ટીકા સાથે જોડીને જોઈ રહ્યા છે. જોકે, અર્શદીપ અથવા તેની PR ટીમ તરફથી હજુ સુધી કોઈ સત્તાવાર સ્પષ્ટતા આપવામાં આવી નથી.
તાજેતરમાં અર્શદીપ એક વીડિયોને લઈને વિવાદમાં ફસાયા હતા. ટીમ ઇન્ડિયાના ખેલાડીઓ સાથેના મસ્તીભર્યા વીડિયોમાં તેણે Tilak Varma વિશે મજાકીય અંદાજમાં કેટલીક ટિપ્પણીઓ કરી હતી. વીડિયોમાં તેણે તિલક વર્માને “અંધેરા” કહી સંબોધ્યા હતા અને સનસ્ક્રીન લગાવી છે કે નહીં તેવો સવાલ કર્યો હતો. ત્યારબાદ Naman Dhir તરફ ઈશારો કરીને તેને “પંજાબનો અસલી ગ્લો” કહ્યા હતા. આ ક્લિપ વાયરલ થતાં સોશિયલ મીડિયા યુઝર્સે અર્શદીપ પર રંગભેદને પ્રોત્સાહન આપવાનો આરોપ લગાવ્યો હતો.
IPL 2026માં અર્શદીપનું પ્રદર્શન પણ ચર્ચામાં રહ્યું. તેણે 14 મેચમાં 14 વિકેટ લઈને Punjab Kings માટે સૌથી વધુ વિકેટ લીધી, પરંતુ તેની 10.20ની ઇકોનોમી ટીમ માટે ચિંતા બની. ડેથ ઓવરોમાં મોંઘી બોલિંગના કારણે પંજાબ કિંગ્સ પ્લેઓફ રેસમાંથી માત્ર 1 પોઈન્ટથી બહાર થઈ ગઈ હતી.