IPL 2026ના ગ્રુપ સ્ટેજના તમામ મુકાબલા પૂર્ણ થઈ ચૂક્યા છે. કેટલીક ટીમોએ પ્લેઓફમાં જગ્યા બનાવી છે, જ્યારે અનેક ટીમોનું અભિયાન સમાપ્ત થયું છે. દરેક સીઝનમાં ફ્રેન્ચાઇઝીઓ વિદેશી ખેલાડીઓ પર કરોડો રૂપિયા ખર્ચતી હોય છે, કારણ કે એક ટીમમાં માત્ર મર્યાદિત વિદેશી ખેલાડીઓને જ સ્થાન મળી શકે છે. જોકે, આ સિઝનમાં કેટલાક મોટા નામો સંપૂર્ણપણે ફ્લોપ સાબિત થયા અને ટીમોની આશાઓ પર પાણી ફેરવી દીધું.
ઇંગ્લેન્ડના યુવા બેટ્સમેન જેકબ બેથેલને શરૂઆતમાં તક ન મળતા ચર્ચાઓ જોરમાં હતી, પરંતુ તક મળ્યા બાદ તેઓ પ્રભાવ છોડી શક્યા નહીં. 7 મેચમાં તેમણે માત્ર 96 રન બનાવ્યા અને તેની એવરેજ 13.71 રહી. ઓપનિંગમાં મોટી શરૂઆત અપાવવાની જવાબદારી તેઓ નિભાવી શક્યા નહોતા.
વેસ્ટ ઇન્ડિઝના શિમરોન હેટમાયર માટે પણ આ સિઝન ખરાબ રહી. રાજસ્થાન રોયલ્સ તરફથી રમતા હેટમાયરે 8 મેચમાં માત્ર 78 રન બનાવ્યા. ખરાબ ફોર્મને કારણે તેને અંતે પ્લેઇંગ ઇલેવનમાંથી બહાર પણ કરવામાં આવ્યા.
ગુજરાત ટાઇટન્સ પ્લેઓફમાં પહોંચી ગઈ હોવા છતાં ગ્લેન ફિલિપ્સનું પ્રદર્શન નિરાશાજનક રહ્યું. 6 મેચમાં તેણે માત્ર 67 રન બનાવ્યા, જેના કારણે ટીમ મેનેજમેન્ટે તેને ડ્રોપ કરીને જેઝન હોલ્ડરને તક આપી.
પંજાબ કિંગ્સના માર્કો યાન્સેન બોલિંગ વિભાગમાં અસર છોડવામાં નિષ્ફળ રહ્યા. 13 મેચમાં તેણે 10થી વધુ ઇકોનોમી રેટ સાથે માત્ર 9 વિકેટ લીધી. ટીમ પ્લેઓફમાં ન પહોંચી શકવાના મુખ્ય કારણોમાં તેની મોંઘી બોલિંગ પણ સામેલ રહી.
મુંબઈ ઇન્ડિયન્સના અનુભવી પેસર ટ્રેન્ટ બોલ્ટ માટે પણ આ સિઝન ભૂલાવી દેવા જેવી રહી. 5 મેચમાં માત્ર 2 વિકેટ લેતા તેનો ઇકોનોમી રેટ 11.62 રહ્યો. ગયા સિઝનમાં શાનદાર પ્રદર્શન કરનાર બોલ્ટ આ વખતે પોતાની લયમાં જોવા મળ્યા નહોતા.