IPL 2024માં ગુરુવારે રમાયેલી મેચમાં પંજાબ કિંગ્સની ટીમે રોમાંચક મેચમાં ગુજરાત ટાઇટન્સને ત્રણ વિકેટે હરાવ્યું હતું. પંજાબ કિંગ્સે 200 રનનો ટાર્ગેટ છેલ્લી ઓવરમાં એક બોલ બાકી રહેતા હાંસલ કરી લીધો હતો.
પંજાબ કિંગ્સની આ જીતમાં શશાંક સિંહની મુખ્ય ભૂમિકા હતી, જેણે 29 બોલમાં 61 રનની અણનમ ઇનિંગ રમી હતી. શશાંક સિંહને તેની ઇનિંગ માટે પ્લેયર ઓફ ધ મેચ પણ પસંદ કરવામાં આવ્યો હતો.
200 રનના ટાર્ગેટનો પીછો કરવા ઉતરેલી પંજાબ કિંગ્સે 16મી ઓવરમાં 150 રનના સ્કોર પર છ વિકેટ ગુમાવી દીધી હતી, ત્યારબાદ શશાંક સિંહે આશુતોષ શર્મા સાથે મળીને ટીમને લક્ષ્યની નજીક પહોંચાડી દીધી હતી. બંને બેટ્સમેનોએ 43 રનની મહત્વપૂર્ણ ભાગીદારી કરી હતી. શશાંક સિંહે 29 બોલમાં 61 રનની અણનમ ઇનિંગમાં છ ચોગ્ગા અને ચાર છગ્ગા ફટકાર્યા હતા. પંજાબ કિંગ્સની જીતના આ હીરોને ટીમે હરાજી દરમિયાન કન્ફ્યુઝનમાં ખરીદ્યો હતો, પરંતુ આજે આ ખેલાડી ટીમની જીતનો હીરો બન્યો હતો.
કોણ છે શશાંક સિંહ?
32 વર્ષીય શશાંક સિંહ ડોમેસ્ટિક ક્રિકેટમાં છત્તીસગઢનું પ્રતિનિધિત્વ કરે છે. તે આઈપીએલમાં દિલ્હી કેપિટલ્સ, રાજસ્થાન રોયલ્સ અને સનરાઈઝર્સ હૈદરાબાદનો ભાગ રહી ચૂક્યો છે. ગત સિઝનમાં તે સનરાઇઝર્સ હૈદરાબાદનો ભાગ હતો. તેણે હૈદરાબાદ માટે 10 IPL મેચોમાં માત્ર 69 રન બનાવ્યા.
તેણે 31 ફર્સ્ટ ક્લાસ, 30 લિસ્ટ A અને 58 T20 મેચ રમી છે. ફર્સ્ટ ક્લાસમાં તેના નામે 858 રન છે, જેમાં એક સદી અને છ અડધી સદી સામેલ છે. તેણે ફર્સ્ટ ક્લાસમાં 12 વિકેટ પણ લીધી છે. લિસ્ટ Aમાં તેણે બે સદી અને ત્રણ અડધી સદીની મદદથી 986 રન બનાવ્યા છે અને 33 વિકેટ લીધી છે. તેના નામે 58 T-20 મેચોમાં 754 રન અને 15 વિકેટ છે.