ઓરેન્જ કેપની રેસ હવે વધુ જોરદાર અને રોમાંચક બની ગઈ છે. લીગ સ્ટેજ પૂર્ણ થયા બાદ હવે માત્ર પ્લેઓફમાં પહોંચેલી ટીમોના બેટર્સ પાસે જ આગળ વધવાની તક છે. આવી સ્થિતિમાં દિલ્હી કેપિટલ્સના સ્ટાર બેટ્સમેન કેએલ રાહુલ ઓરેન્જ કેપની રેસમાંથી લગભગ બહાર થઈ ગયા છે. સૌથી મોટું દુઃખ એ રહ્યું કે તેઓ આ સિઝનમાં 600 રનનો આંકડો પણ પાર કરી શક્યા નહીં.
હાલ IPL 2026માં સૌથી વધુ રન બનાવનાર બેટર ગુજરાત ટાઇટન્સના ઓપનર સાઈ સુદર્શન છે. તેણે 14 મેચમાં 638 રન બનાવી ઓરેન્જ કેપ પર મજબૂત પકડ બનાવી છે. તેની સતત શાનદાર બેટિંગ ગુજરાતને પ્લેઓફ સુધી પહોંચાડવામાં મહત્વપૂર્ણ રહી છે.
બીજા નંબર પર પણ ગુજરાત ટાઇટન્સનો જ કેપ્ટન શુભમન ગિલ છે. ગિલે 13 મેચમાં 616 રન ફટકારી સાઈ સુદર્શનને કડક ટક્કર આપી છે. ગુજરાતની ટીમ હજુ ટૂર્નામેન્ટમાં હોવાને કારણે આ બંને ખેલાડીઓ પાસે આગળ વધીને વધુ રન બનાવવાની મોટી તક છે.
આ યાદીમાં ત્રીજા સ્થાને સનરાઇઝર્સ હૈદરાબાદના હેનરિક ક્લાસેન છે. ક્લાસેને 14 મેચમાં 606 રન બનાવ્યા છે. ખાસ વાત એ છે કે ટોપ-5માં સામેલ ખેલાડીઓમાં ક્લાસેન એકમાત્ર એવા બેટર છે, જે ઓપનિંગ કર્યા વગર પણ ઓરેન્જ કેપની રેસમાં ટકી રહ્યા છે.
બીજી તરફ દિલ્હી કેપિટલ્સ પ્લેઓફમાં પહોંચવામાં નિષ્ફળ જતા કેએલ રાહુલનું અભિયાન સમાપ્ત થઈ ગયું છે. રાહુલે 14 મેચમાં 593 રન બનાવ્યા, પરંતુ ટીમ બહાર થતા હવે તે 600 રનનો આંકડો પણ પાર કરી શકશે નહીં.
રાજસ્થાન રોયલ્સના યુવા બેટ્સમેન વૈભવ સુર્યવંશી 583 રન સાથે ટોપ-5માં છે. રાજસ્થાન પ્લેઓફમાં પહોંચતાં હવે વૈભવ પાસે પણ ઓરેન્જ કેપ જીતવાની તક જીવંત છે. IPL 2026ના અંતિમ તબક્કામાં હવે ઓરેન્જ કેપ માટે જબરદસ્ત મુકાબલો જોવા મળશે.