પંજાબ કિંગ્સ સામે નરેન્દ્ર મોદી સ્ટેડિયમમાં રમાયેલી મેચમાં ઓપનર શુભમન ગીલે એક મોટો રેકોર્ડ પોતાના નામે કરી લીધો છે. ગુરુવારે પંજાબ કિંગ્સે ગુજરાત ટાઇટન્સને ત્રણ વિકેટે હરાવ્યું હતું.
ગુજરાતના કેપ્ટન શુભમન ગિલે અડધી સદીની ઇનિંગ રમી હતી. સુકાની તરીકે ગિલની આ પ્રથમ અડધી સદી હતી. ગિલે 48 બોલમાં 89 રનની જોરદાર ઇનિંગ રમી હતી, જેના કારણે ગુજરાતે પંજાબ કિંગ્સ સામે 199 રન બનાવ્યા હતા.
IPL 2024 પહેલા, ગુજરાત ટાઇટન્સ દ્વારા શુભમન ગિલને તેમના નવા કેપ્ટન તરીકે નિયુક્ત કરવામાં આવ્યા હતા. આ સ્ટાર ભારતીય બેટ્સમેન IPLના ઈતિહાસમાં નવમો સૌથી યુવા કેપ્ટન છે. શુભમન ગિલ ગુજરાત ટાઇટન્સ માટે 1500 રન પૂરા કરનાર પ્રથમ ખેલાડી બની ગયો છે. તેના સિવાય અન્ય કોઈ બેટ્સમેન ગુજરાત માટે 1000 રન પણ પૂરા કરી શક્યો નથી. 37 ઇનિંગ્સમાં શુભમન ગિલે 148ના સ્ટ્રાઇક રેટથી 1537 રન બનાવ્યા છે.
2022ની IPL મેગા ઓક્શન પહેલા પ્રી-ઓક્શન ડ્રાફ્ટમાં ગિલને અમદાવાદ સ્થિત ફ્રેન્ચાઇઝીએ હાર્દિક પંડ્યા અને રાશિદ ખાન સાથે રૂ. 8 કરોડમાં ખરીદ્યો હતો. શુભમન ગિલે 2022માં ગુજરાત ટાઇટન્સની ટાઇટલ જીતવામાં મહત્વની ભૂમિકા ભજવી હતી.
તેણે 16 મેચમાં 483 રન બનાવ્યા હતા. આ દરમિયાન તેણે ચાર અડધી સદી ફટકારી હતી. ગિલે IPL 2023માં 890 રન બનાવ્યા હતા.