આઈપીએલ 2027 પહેલાં લખનૌ સુપર જાયન્ટ્સ (LSG)માં મોટા ફેરફારો જોવા મળી શકે છે. તાજેતરના અહેવાલો મુજબ, ઋષભ પંતના કેપ્ટન પદ છોડ્યા બાદ ઓસ્ટ્રેલિયન ઓલરાઉન્ડર મિચેલ માર્શ ટીમના નવા કેપ્ટન બનવાના સૌથી મજબૂત દાવેદાર તરીકે સામે આવ્યા છે. જોકે ફ્રેન્ચાઇઝી તરફથી હજુ સુધી કોઈ સત્તાવાર જાહેરાત કરવામાં આવી નથી, પરંતુ ટીમ મેનેજમેન્ટ માર્શના નામ પર ગંભીરતાથી વિચાર કરી રહ્યું હોવાનું કહેવાય છે.
ઋષભ પંત માટે IPL 2025 અને 2026ની સીઝન ખાસ સફળ રહી નહોતી. તેમના નેતૃત્વમાં LSG સતત બે સીઝનમાં નિરાશાજનક પ્રદર્શન કરી હતી અને IPL 2026માં ટીમ પોઈન્ટ્સ ટેબલમાં સૌથી નીચે રહી હતી. ત્યારબાદ પંતે કેપ્ટન પદ છોડવાનો નિર્ણય લીધો હતો. LSGના ક્રિકેટ ડિરેક્ટર ટોમ મૂડીએ પણ ટીમમાં સંપૂર્ણ ‘રીસેટ’ની જરૂરિયાત વ્યક્ત કરી હતી.
બીજી તરફ, મિચેલ માર્શ છેલ્લા બે સીઝનથી LSGના સૌથી વિશ્વસનીય બેટરોમાં સામેલ રહ્યા છે. તેમણે સતત રન બનાવ્યા છે અને ઓસ્ટ્રેલિયાની T20 ટીમના કેપ્ટન તરીકે નેતૃત્વનો પણ અનુભવ ધરાવે છે. આ કારણોસર તેઓ LSG માટે આદર્શ કેપ્ટન માનવામાં આવી રહ્યા છે. ટીમના મુખ્ય કોચ જસ્ટિન લેંગર અને ક્રિકેટ ડિરેક્ટર ટોમ મૂડી સાથે તેમના સારા સંબંધો પણ તેના પક્ષમાં જાય છે.
આ દરમિયાન ઋષભ પંતના દિલ્હી કેપિટલ્સમાં વાપસીના અહેવાલો પણ જોર પકડી રહ્યા છે. રિપોર્ટ્સ મુજબ દિલ્હી કેપિટલ્સ અને LSG વચ્ચે પંત અને કુલદીપ યાદવને લઈને હાઇ-પ્રોફાઇલ ટ્રેડ ડીલ લગભગ પૂર્ણ થવાના આરે છે. જો આ ડીલ સત્તાવાર બને છે તો LSG માટે માર્શના કેપ્ટન બનવાની શક્યતા વધુ મજબૂત બનશે.
IPL 2027 પહેલાં LSG નવી દિશામાં આગળ વધવા માગે છે અને મિચેલ માર્શને કેપ્ટન બનાવવાનો નિર્ણય ટીમના પુનર્નિર્માણનો મહત્વપૂર્ણ ભાગ સાબિત થઈ શકે છે.