ઓપનર યશસ્વી જયસ્વાલે માત્ર 13 બોલમાં અડધી સદી ફટકારી છે. આ સાથે તે IPLમાં સૌથી ઝડપી ફિફ્ટી બનાવનાર ખેલાડી બની ગયો છે. તેણે કેએલ રાહુલનો રેકોર્ડ તોડ્યો છે.
રાહુલે 2018માં 14 બોલમાં 50 રન બનાવ્યા હતા. યશસ્વી જયસ્વાલે ઇનિંગની ત્રીજી ઓવરમાં જ પોતાની અડધી સદી પૂરી કરી લીધી છે. તેણે 13 બોલમાં 50 રન બનાવ્યા હતા. તેણે પોતાની ઇનિંગમાં 7 ફોર અને 3 સિક્સર ફટકારી છે. આ દરમિયાન તેનો સ્ટ્રાઈક રેટ 384.62 હતો.
કોલકાતા નાઈટ રાઈડર્સ સામેની મેચમાં યશસ્વીએ પહેલી જ ઓવરમાં 26 રન ફટકારીને પોતાના ઈરાદા સ્પષ્ટ કરી દીધા હતા. કોલકાતા તરફથી કેપ્ટન નીતીશ રાણાએ પ્રથમ ઓવર નાંખી, જેમાં યશસ્વી જયસ્વાલે ત્રણ ચોગ્ગા અને બે છગ્ગા ફટકારીને કુલ 26 રન બનાવ્યા. પ્રથમ ઓવરમાં 26 રન બનાવ્યા બાદ જયસ્વાલે બીજી ઓવરમાં 11 રન બનાવ્યા અને ટીમનો સ્કોર 37 રન સુધી પહોંચાડ્યો. ત્રીજી ઓવરમાં તે ચોગ્ગાની હેટ્રિક ફટકારીને અડધી સદીની નજીક પહોંચી ગયો હતો. તેણે 13માં બોલ પર સિંગલ લઈને પોતાની અડધી સદી પૂરી કરી.
IPLમાં સૌથી ઝડપી ફિફ્ટીનો રેકોર્ડ કેએલ રાહુલ અને પેટ કમિન્સના નામે હતો. બંનેએ 14-14 બોલમાં અડધી સદી પૂરી કરી હતી. રાહુલે 2018માં દિલ્હી સામે અને પેટ કમિન્સે મુંબઈ ઈન્ડિયન્સ સામે આ કારનામું કર્યું હતું. યશસ્વી જયસ્વાલ IPL 2023માં શાનદાર ફોર્મમાં છે. તે ચાલુ સિઝનમાં 500થી વધુ રન બનાવનાર પ્રથમ ભારતીય બેટ્સમેન પણ બની ગયો છે. યશસ્વી જયસ્વાલે 12 મેચમાં 550થી વધુ રન બનાવ્યા છે. IPL 2023માં સૌથી વધુ રન બનાવવાનો રેકોર્ડ ફાફ ડુપ્લેસીના નામે છે જેણે 11 મેચમાં 576 રન બનાવ્યા છે.