લેગ સ્પિનર યુઝવેન્દ્ર ચહલે IPL 2023ની 56મી મેચમાં એક મોટી સિદ્ધિ મેળવી છે. કોલકાતા નાઈટ રાઈડર્સ સામેની મેચ દરમિયાન તે આઈપીએલના ઈતિહાસમાં સૌથી વધુ વિકેટ લેનાર બોલર બન્યો હતો.
ચહલે વેસ્ટ ઈન્ડિઝના ભૂતપૂર્વ ઓલરાઉન્ડર ડ્વેન બ્રાવોને પાછળ છોડી દીધો, જેણે આઈપીએલમાં 183 વિકેટ લીધી છે. યુઝવેન્દ્ર ચહલે આઈપીએલની પોતાની 143મી મેચમાં આ સિદ્ધિ મેળવી હતી.
કોલકાતાના ઈડન ગાર્ડન્સ મેદાન પર રમાઈ રહેલી કોલકાતા નાઈટ રાઈડર્સ વિ રાજસ્થાન રોયલ્સ મેચ દરમિયાન કેપ્ટન નીતિશ રાણાની વિકેટ લઈને સૌથી વધુ વિકેટ લેવાના મામલે લેગ-સ્પિનર યુઝવેન્દ્ર ચહલે ડ્વેન બ્રાવોને પાછળ છોડી દીધો. રોયલ ચેલેન્જર્સ બેંગ્લોર તરફથી રમતા ચહલ IPL 2022માં રાજસ્થાન રોયલ્સમાં જોડાયા હતા અને પહેલી જ સિઝનમાં ટીમ માટે સૌથી વધુ વિકેટ લેનાર બોલર બન્યો હતો અને તેણે પર્પલ કેપ પણ જીતી હતી. તેણે આ સિઝનમાં 27 વિકેટ લીધી હતી. રાજસ્થાન રોયલ્સના સ્ટાર સ્પિનરે ચાલુ સિઝનમાં પણ આ જ ફોર્મ જાળવી રાખ્યું છે અને 11 મેચમાં 17 વિકેટ ઝડપી છે.
ચહલ પહેલા અમિત મિશ્રા IPLમાં ભારતીય બોલર તરીકે સૌથી વધુ વિકેટ લેવાના મામલે ટોચ પર પહોંચી ગયો હતો. તેણે 2013માં આ પદ હાંસલ કર્યું હતું. પરંતુ ત્યાર બાદ લસિથ મલિંગા અને ડ્વેન બ્રાવોએ બધાને પાછળ છોડી દીધા હતા.
IPLમાં સૌથી વધુ વિકેટ લેનાર બોલર:
યુઝવેન્દ્ર ચહલ – 185
ડ્વેન બ્રાવો – 183
પિયુષ ચાવલા – 174
અમિત મિશ્રા – 172
આર અશ્વિન – 171
લસિથ મલિંગા – 170