વિરાટ કોહલીનો ‘ચંપક’ રોબો-ડોગ પર પણ ફૂટ્યો ગુસ્સો

ભારતીય સ્ટાર ક્રિકેટર Virat Kohliએ IPL દરમિયાન ખેલાડીઓ પર સતત થતી વીડિયો રેકોર્ડિંગ અને સોશિયલ મીડિયા કવરેજને લઈને ખુલ્લેઆમ નારાજગી વ્યક્ત કરી છે. Royal Challengers Bengaluruના ખેલાડી કોહલીએ RCB પોડકાસ્ટમાં કહ્યું કે પ્રેક્ટિસ સેશન દરમિયાન સતત કેમેરા પાછળ ફરતા રહેતા હોવાથી ખેલાડીઓ સ્વાભાવિક રીતે તૈયારી કરી શકતા નથી.

કોહલીએ જણાવ્યું કે, “તમે પ્રેક્ટિસ માટે જાઓ અને છ કેમેરા સતત તમારો પીછો કરે, તો તે આરામદાયક લાગતું નથી. ખેલાડીને પોતાના રમત પર શાંતિથી કામ કરવાની સ્વતંત્રતા હોવી જોઈએ. જો દરેક વસ્તુ શૂટ થશે અને તેના પર ચર્ચા થશે તો ખેલાડી સ્વાભાવિક રહી શકશે નહીં.”

તેણે વધુમાં કહ્યું કે લોકો ખેલાડીઓને મેચના પ્રદર્શનના આધારે જજે, નેટ પ્રેક્ટિસ અથવા તૈયારીના આધારે નહીં. કોહલીના મતે સોશિયલ મીડિયા ટીમો માટે સ્પષ્ટ નિયમો હોવા જોઈએ કે શું શૂટ કરવું અને શું નહીં.

સોશિયલ મીડિયા કન્ટેન્ટના વધતા દબાણ અંગે વાત કરતાં કોહલીએ કહ્યું કે તેને રમતનું દબાણ પસંદ છે, પરંતુ કેમેરા અને વધારાની દેખરેખનો દબાણ પસંદ નથી. તેણે કહ્યું કે ફેન્સ સાથે જોડાવું મહત્વનું છે, પરંતુ ખેલાડીઓની પ્રાઇવસી પણ એટલી જ જરૂરી છે.

કોહલીએ IPLમાં ચર્ચામાં રહેલા ‘ચંપક’ રોબો-ડોગ અંગે પણ અસંતોષ વ્યક્ત કર્યો. તેણે જણાવ્યું કે તેઓ Kane Williamson સાથે ગંભીર ચર્ચા કરી રહ્યા હતા ત્યારે રોબો-ડોગ તેની પાસે આવી હાથ હલાવવા લાગ્યો. ત્યારબાદ તેણે સ્ટાફને તેને દૂર લઈ જવા કહ્યું જેથી તેઓ શાંતિથી વાત કરી શકે.