પાકિસ્તાન ટીમના બેટ્સમેન ફખર ઝમાને શનિવારે રાત્રે રાવલપિંડીના મેદાન પર રમાયેલી વન-ડે ઈન્ટરનેશનલ મેચમાં જોરદાર ઈનિંગ રમી હતી. ન્યુઝીલેન્ડના બોલરો સામે ઝઝૂમનાર ફખરે પૂર્વ ભારતીય ઓપનર સચિન તેંડુલકરનો રેકોર્ડ તોડીને રોહિત શર્માના રેકોર્ડની બરોબરી કરી છે.
વન-ડે ઈન્ટરનેશનલ ક્રિકેટમાં ત્રીજી વખત ફખર ઝમાનના બેટથી 180 કે તેથી વધુ રનની ઈનિંગ આવી છે. આ રીતે તેણે સચિન તેંડુલકર અને વિવ રિચર્ડ્સ જેવા દિગ્ગજોને પાછળ છોડી દીધા છે.
ન્યુઝીલેન્ડ સામે 337 રનના વિશાળ લક્ષ્યાંકનો પીછો કરતી વખતે ફખર ઝમાને 144 બોલમાં 17 ચોગ્ગા અને 6 છગ્ગાની મદદથી અણનમ 180 રન બનાવ્યા હતા. આ દરમિયાન તેનો સ્ટ્રાઈક રેટ 125 હતો. ODI ક્રિકેટમાં ફખર ઝમાનની 180 કે તેથી વધુ રનની આ ત્રીજી ઇનિંગ હતી. અત્યાર સુધી સચિન તેંડુલકર અને વિવ રિચર્ડ્સ 2-2 વખત આ કારનામું કરી ચૂક્યા છે. આ રીતે ફખર આ બંને દિગ્ગજોથી આગળ નીકળી ગયો છે અને તેણે 3-3 વખત આ કારનામું કરનાર માર્ટિન ગુપ્ટિલ અને રોહિત શર્માની બરાબરી કરી લીધી છે.
આટલું જ નહીં વન-ડે ઈન્ટરનેશનલ ક્રિકેટમાં 67 ઈનિંગ્સ બાદ તે સૌથી વધુ રન બનાવનારની યાદીમાં બીજા સ્થાને પહોંચી ગયો છે. માત્ર હાશિમ અમલાએ તેના કરતા વધુ રન બનાવ્યા છે. શનિવારે ODI ક્રિકેટમાં 3000 રન પૂરા કરનાર બેટ્સમેનોની યાદીમાં સામેલ ફખર ઝમાને 94.3ના સ્ટ્રાઈક રેટથી 3082 રન પૂરા કર્યા છે. બોલની વાત કરીએ તો ફખર ઝમાન સૌથી ઝડપી 3000 ODI રન પૂરા કરનાર બેટ્સમેન છે. પાકિસ્તાનનો કેપ્ટન બાબર આઝમ પણ આટલી ઓછી મેચમાં 3000 રન પૂરા કરી શક્યો નથી.