આંતરરાષ્ટ્રીય ક્રિકેટ પરિષદ (ICC)ની એડિનબર્ગમાં યોજાયેલી વાર્ષિક બેઠકમાં એસોસિયેટ દેશોના ક્રિકેટ સંચાલનને લઈને મહત્વપૂર્ણ નિર્ણય લેવામાં આવ્યા છે. ICCએ સ્પષ્ટ કર્યું છે કે USA ક્રિકેટ અને ક્રિકેટ કેનેડા પર લાગેલો સસ્પેન્શન હાલ યથાવત રહેશે. સાથે જ ફ્રાન્સ ક્રિકેટને પણ સત્તાવાર રીતે ‘ઓન નોટિસ’ પર મૂકવામાં આવ્યું છે.
ICC અનુસાર, USA ક્રિકેટ અને ક્રિકેટ કેનેડામાં ગવર્નન્સ, વહીવટી વ્યવસ્થા અને સભ્યપદ સંબંધિત નિયમોના પાલનમાં ગંભીર ખામીઓ જોવા મળી છે. આ બંને સંસ્થાઓને અગાઉ પણ સુધારાના નિર્દેશ આપવામાં આવ્યા હતા, પરંતુ અત્યાર સુધી જરૂરી પ્રગતિ ન થતાં સસ્પેન્શન હટાવવામાં આવ્યું નથી. જોકે, બંને દેશોની રાષ્ટ્રીય ટીમો ICCની સ્પર્ધાઓમાં ભાગ લઈ શકશે અને ખેલાડીઓના વિકાસને અસર ન થાય તે માટે જરૂરી સહાય ચાલુ રહેશે.
બીજી તરફ, ફ્રાન્સ ક્રિકેટને પણ ICCએ ચેતવણી આપી છે. સંસ્થાને આગામી 12 મહિનામાં ગવર્નન્સ અને વહીવટી ખામીઓ દૂર કરવા માટે સમય આપવામાં આવ્યો છે. જો નિર્ધારિત સમયગાળા દરમિયાન જરૂરી સુધારા નહીં થાય તો ફ્રાન્સ ક્રિકેટ સામે પણ કડક કાર્યવાહી થઈ શકે છે.
ICCની બેઠકમાં વધુ એક મહત્વપૂર્ણ નિર્ણય હેઠળ મોરિશિયસ ક્રિકેટ ફેડરેશનને એસોસિયેટ સભ્યપદ આપવામાં આવ્યું છે. આ સાથે ICCના કુલ સભ્યોની સંખ્યા વધીને 111 થઈ ગઈ છે, જેમાં 12 ફુલ મેમ્બર અને 99 એસોસિયેટ મેમ્બર સામેલ છે.
ICCએ સ્પષ્ટ કર્યું છે કે વૈશ્વિક સ્તરે ક્રિકેટના વિકાસ માટે પારદર્શક અને જવાબદાર વહીવટ અનિવાર્ય છે. તેથી સભ્ય દેશોએ સંસ્થાકીય નિયમોનું પાલન કરવું જરૂરી છે, નહીં તો ભવિષ્યમાં વધુ કડક પગલાં લેવામાં આવશે.
🚨 The ICC has decided to continue the suspension of USA Cricket and Cricket Canada following its Annual Conference in Edinburgh.
The ICC also confirmed Mauritius Cricket Federation as its newest Associate Member, taking the governing body’s membership to 111 nations.… pic.twitter.com/sU5injJE5B
— TheWicketReport (@WicketReport) July 12, 2026