ભારત અને ઇંગ્લેન્ડ વચ્ચે રમાનારી ત્રીજી અને નિર્ણાયક વનડે પહેલાં તમામની નજર સ્ટાર બેટ્સમેન વિરાટ કોહલી પર છે. કાર્ડિફમાં રમાયેલી બીજી વનડેમાં કોહલીએ શાનદાર 65 રનની ઇનિંગ્સ રમીને ફોર્મમાં વાપસી કરી હતી, પરંતુ હવે ક્રિકેટનું મક્કા કહેવાતા લોર્ડ્સના મેદાન પર તેની સૌથી મોટી કસોટી થવાની છે.
વિરાટ કોહલી વિશ્વના લગભગ દરેક મોટા મેદાન પર યાદગાર ઇનિંગ્સ રમી ચૂક્યા છે, પરંતુ લોર્ડ્સનું મેદાન તેના માટે અત્યાર સુધી ખાસ સફળ રહ્યું નથી. આશ્ચર્યજનક વાત એ છે કે કોહલીએ લોર્ડ્સમાં અત્યાર સુધી એક પણ આંતરરાષ્ટ્રીય અડધી સદી ફટકારી નથી. વનડેમાં પણ તેનો સર્વોચ્ચ સ્કોર માત્ર 45 રન રહ્યો છે, જ્યારે અન્ય ફોર્મેટમાં પણ તેઓ મોટી ઇનિંગ્સ રમવામાં સફળ રહ્યા નથી.
જોકે, તાજેતરમાં કાર્ડિફમાં ઇંગ્લેન્ડ સામેની 65 રનની ઇનિંગ્સે સાબિત કર્યું છે કે કોહલી ફરી લયમાં આવી રહ્યા છે. આ ઇનિંગ્સ દરમિયાન તેણે અનેક મહત્વના રેકોર્ડ પોતાના નામે કર્યા અને ટીમ માટે જવાબદારીભરી બેટિંગ પણ કરી હતી.
ભારત અને ઇંગ્લેન્ડ વચ્ચેની ત્રણ મેચની વનડે શ્રેણી હાલમાં 1-1થી બરાબરી પર છે. તેથી લોર્ડ્સમાં રમાનારી અંતિમ મેચ માત્ર શ્રેણી જીતવા માટે જ નહીં, પરંતુ વિરાટ કોહલી માટે પોતાના લોર્ડ્સના ખરાબ રેકોર્ડને બદલવાની પણ મોટી તક બની રહેશે. ક્રિકેટપ્રેમીઓ આશા રાખી રહ્યા છે કે ‘કિંગ કોહલી’ આ ઐતિહાસિક મેદાન પર પહેલી વખત અડધી સદી અથવા સદી ફટકારીને ટીમ ઈન્ડિયાને શ્રેણી જીતાડશે.
જો કોહલી આ મેચમાં મોટી ઇનિંગ્સ રમે છે, તો તે માત્ર લોર્ડ્સમાં પોતાના વર્ષો જૂના સૂકા રેકોર્ડનો અંત જ નહીં લાવે, પરંતુ નિર્ણાયક મુકાબલામાં ભારતને જીત અપાવવામાં પણ મહત્વપૂર્ણ ભૂમિકા ભજવી શકે છે. હવે સૌની નજર લોર્ડ્સ પર છે કે શું વિરાટ કોહલી આ વખતે પોતાના બેટથી ઇતિહાસ બદલી શકશે.