વેસ્ટ ઈન્ડિઝ ક્રિકેટ ટીમ માટે 2027ના ODI વર્લ્ડ કપ પહેલાં મોટો ઝટકો લાગ્યો છે. બે વખતની વર્લ્ડ કપ ચેમ્પિયન વેસ્ટ ઈન્ડિઝ હવે ટૂર્નામેન્ટ માટે સીધી ક્વોલિફાય કરી શકશે નહીં. અફઘાનિસ્તાને આયર્લેન્ડ સામેની ODI સિરીઝમાં શાનદાર પ્રદર્શન કરીને 2027 વર્લ્ડ કપમાં પોતાનું સીધું સ્થાન નિશ્ચિત કરી લીધું છે. તેના કારણે વેસ્ટ ઈન્ડિઝની સીધી ક્વોલિફિકેશનની આશા સમાપ્ત થઈ ગઈ છે.
2027નો ODI વર્લ્ડ કપ દક્ષિણ આફ્રિકા, ઝિમ્બાબ્વે અને નામિબિયામાં યોજાવાનો છે. આ વખતે ટૂર્નામેન્ટમાં કુલ 14 ટીમો ભાગ લેશે. દક્ષિણ આફ્રિકા અને ઝિમ્બાબ્વે યજમાન હોવાથી સીધા ક્વોલિફાય થયા છે, જ્યારે બાકીની ટોચની ODI રેન્કિંગ ધરાવતી ટીમોને પણ સીધી એન્ટ્રી મળશે. અફઘાનિસ્તાનની તાજેતરની સફળતાએ વેસ્ટ ઈન્ડિઝને આ સીધી રેસમાંથી બહાર કરી દીધું છે.
વેસ્ટ ઈન્ડિઝ પાસે હજુ પણ વર્લ્ડ કપમાં પહોંચવાનો એક રસ્તો ખુલ્લો છે. ટીમે હવે 2027ના વર્લ્ડ કપ ક્વોલિફાયર ટૂર્નામેન્ટમાં સારું પ્રદર્શન કરવું પડશે. આ ક્વોલિફાયર ફેબ્રુઆરી-માર્ચ 2027 દરમિયાન યોજાવાની છે. તેમાં 30 સપ્ટેમ્બર 2026ની ODI રેન્કિંગમાં યજમાન સિવાયની સૌથી નીચી રેન્ક ધરાવતી બે ફુલ મેમ્બર ટીમો, વર્લ્ડ કપ લીગ-2ની ટોચની ચાર ટીમો અને ક્વોલિફાયર પ્લેઓફની ટોચની ચાર ટીમો સામેલ થશે.
ખાસ વાત એ છે કે વેસ્ટ ઈન્ડિઝ માટે આ સતત ત્રીજી વખત છે જ્યારે ટીમ ODI વર્લ્ડ કપ માટે સીધી ક્વોલિફિકેશન મેળવી શકી નથી. 2019માં ટીમે ક્વોલિફાયર દ્વારા વર્લ્ડ કપમાં સ્થાન મેળવ્યું હતું, પરંતુ 2023માં ક્વોલિફાયર પાર કરવામાં નિષ્ફળ રહી હતી. પરિણામે 2023નો વર્લ્ડ કપ વેસ્ટ ઈન્ડિઝ વિના રમાયો હતો. હવે 2027માં ફરી આવી સ્થિતિ ન સર્જાય તે માટે ટીમે ક્વોલિફાયર ટૂર્નામેન્ટમાં પોતાનું શ્રેષ્ઠ પ્રદર્શન કરવું પડશે.
🚨 𝗪𝗘𝗦𝗧 𝗜𝗡𝗗𝗜𝗘𝗦 𝗙𝗔𝗜𝗟 𝗧𝗢 𝗤𝗨𝗔𝗟𝗜𝗙𝗬 𝗗𝗜𝗥𝗘𝗖𝗧𝗟𝗬 𝗙𝗢𝗥 𝗪𝗢𝗥𝗟𝗗 𝗖𝗨𝗣 𝟮𝟬𝟮𝟳 ❌
They came close this time, but they’ll now have to play the World Cup qualifiers.
The two-time World Champions have not been up to the mark for decades, and they have to… pic.twitter.com/EVwL1DrQiY
— Cricketangon (@cricketangon) August 11, 2026