ભારતીય લેગ સ્પિનર યુઝવેન્દ્ર ચહલનો ઈંગ્લેન્ડમાં શાનદાર ફોર્મ યથાવત્ છે. ઈંગ્લેન્ડના સ્થાનિક વન-ડે કપમાં નોર્થમ્પ્ટનશાયર તરફથી રમતા ચહલે સમરસેટ સામે ઘાતક બોલિંગ કરીને ત્રણ મહત્વની વિકેટ ઝડપી હતી. ચહલે 10 ઓવરમાં માત્ર 35 રન આપીને 3 વિકેટ ઝડપી હતી. તેની શાનદાર બોલિંગના કારણે નોર્થમ્પ્ટનશાયરે સમરસેટને માત્ર 185 રનમાં ઓલઆઉટ કરી દીધું હતું. ત્યારબાદ નોર્થમ્પ્ટનશાયરે 7 વિકેટે સરળ જીત મેળવી હતી.
સમરસેટ સામે ચહલે ખાસ કરીને મધ્ય અને નીચલા ક્રમના બેટ્સમેનોને પોતાની સ્પિનમાં ફસાવ્યા હતા. તેણે આર્ચી વોનને વિકેટકીપર લૂઈસ મેકમેનસના હાથે સ્ટમ્પિંગ કરાવ્યા હતા. ત્યારબાદ જેક લીચ અને જેક બોલને પણ પેવેલિયનનો રસ્તો બતાવ્યો હતો. નોર્થમ્પ્ટનશાયર તરફથી રોબ કીઓગે પણ ચાર વિકેટ ઝડપી હતી, જેના કારણે સમરસેટની આખી ટીમ 47 ઓવરમાં 185 રનમાં સમેટાઈ ગઈ હતી.
ચહલ માટે આ ટૂર્નામેન્ટ અત્યાર સુધી ખાસ રહ્યું છે. તે 7 મેચમાં કુલ 15 વિકેટ ઝડપી ચૂક્યો છે અને 21ની સરેરાશથી બોલિંગ કરી રહ્યો છે. આ પ્રદર્શન સાથે તે મેટ્રો બેંક વન-ડે કપમાં સૌથી વધુ વિકેટ લેનારા વિદેશી બોલરોમાં ટોચ પર પહોંચી ગયો છે.
ચહલના સતત શાનદાર પ્રદર્શન બાદ હવે ભારતીય ટીમમાં તેની વાપસીની ચર્ચા પણ શરૂ થઈ છે. ટીમ ઈન્ડિયામાં હાલમાં કુલદીપ યાદવ, રવિન્દ્ર જાડેજા અને અક્ષર પટેલ જેવા સ્પિનરો મજબૂત દાવેદાર છે. તેમ છતાં ચહલનો અનુભવ અને વિકેટ લેવાની ક્ષમતા તેને વન-ડે ક્રિકેટ માટે ઉપયોગી વિકલ્પ બનાવે છે.
જો ચહલ આ જ પ્રકારનું પ્રદર્શન ચાલુ રાખશે, તો આગામી વન-ડે શ્રેણીઓ માટે ભારતીય પસંદગીકારો ફરી એકવાર તેના નામ પર વિચાર કરી શકે છે. ઈંગ્લેન્ડની ધરતી પર તેની સતત સફળતા ચહલ માટે ટીમ ઈન્ડિયામાં વાપસીના દરવાજા ખોલી શકે છે.
15 wickets in 7 games at an economy of 4.5! Yuzvendra Chahal is putting on an absolute masterclass in county cricket. Spin wizardry at its finest! 🎯🔥#YuzvendraChahal #OneDayCup #Northants #CountyCricket pic.twitter.com/KCbN5N5Kbz
— CricketTimes.com (@CricketTimesHQ) August 10, 2026