ચેતેશ્વર પૂજારાના સદી, સસેક્સ માટે આવું કરનાર પ્રથમ ભારતીય બન્યો

ભારતીય બેટ્સમેન ચેતેશ્વર પૂજારાએ શનિવારે (4 મે) ડર્બીશાયર સામે રમાઈ રહેલી કાઉન્ટી ચેમ્પિયનશિપ ડિવિઝન 2 મેચમાં શાનદાર સદી ફટકારીને સસેક્સને મજબૂત સ્થિતિમાં પહોંચાડી દીધું છે. પૂજારા 167 બોલમાં 104 રન બનાવીને અણનમ રહ્યો હતો, જેમાં તેણે 10 ફોર ફટકારી હતી. આ કાઉન્ટી સિઝનમાં આ તેની પ્રથમ સદી છે.

આ સિઝનની પ્રથમ મેચમાં પૂજારાએ ગ્લોસ્ટરશાયર સામે 86 અને 44 રનની અને લેસ્ટરશાયર સામે 38 રનની ઇનિંગ રમી હતી.

પુજારાની ઇનિંગના દમ પર બીજા દિવસની રમતના અંતે સસેક્સે પ્રથમ ઇનિંગમાં 5 વિકેટના નુકસાન પર 357 રન બનાવ્યા હતા. આ સાથે સસેક્સની કુલ લીડ વધીને 111 રન થઈ ગઈ છે. પૂજારા સિવાય જેમ્સ કોલ્સે 72 રન અને ટોમ હેન્સે 58 રન બનાવ્યા હતા.

આ પહેલા બેટિંગ માટે આમંત્રણ મળ્યા બાદ ડર્બીશાયરની ટીમે પ્રથમ દાવમાં 146 રન બનાવ્યા હતા. લુઈસ રીસે 50 રન, બ્લેર ટિકનરે 47 રન અને એન્યુરિન ડોનાલ્ડે 44 રન બનાવ્યા હતા.

આ સદી સાથે પૂજારાએ સસેક્સ કાઉન્ટી માટે 2000 ફર્સ્ટ ક્લાસ રન પણ પૂરા કર્યા છે. તેણે માત્ર 29 ઇનિંગ્સમાં આ આંકડો પાર કર્યો હતો. સસેક્સ માટે 2000 કે તેથી વધુ રન બનાવનાર તે પ્રથમ ભારતીય બન્યો.

ઉલ્લેખનીય છે કે પુજારા લાંબા સમયથી ભારતીય ટેસ્ટ ટીમની બહાર છે. તેણે તેની છેલ્લી મેચ ગયા વર્ષે જૂન 2023માં ઓસ્ટ્રેલિયા સામે ધ ઓવલ ખાતે રમી હતી.