દિલ્હી પ્રીમિયર લીગ (DPL) 2026માં ક્રિકેટ ચાહકોને એક એવો ક્ષણ જોવા મળ્યો, જે સામાન્ય રીતે ફૂટબોલના મેદાન પર જોવા મળે છે. ન્યૂ દિલ્હી ટાઈગર્સના કેપ્ટન હિમ્મત સિંહે પોતાની શાનદાર હાજરજવાબી અને ચપળ ફિલ્ડિંગથી ફૂટબોલ સ્ટાઇલમાં રનઆઉટ કરીને સૌનું ધ્યાન ખેંચી લીધું. આ અનોખો વીડિયો સોશિયલ મીડિયા પર ઝડપથી વાયરલ થઈ રહ્યો છે.
મેચ દરમિયાન બેટ્સમેને બોલને રમ્યા બાદ બે રન લેવા પ્રયાસ કર્યો હતો. ફિલ્ડરે બોલ રોકવાનો પ્રયાસ કર્યો, પરંતુ મિસફિલ્ડ થતાં બોલ થોડો દૂર જતો રહ્યો. એ જ સમયે હિમ્મત સિંહ ઝડપથી બોલ સુધી પહોંચ્યા અને તેને હાથથી ઉઠાવવાને બદલે સીધો પગથી સ્ટમ્પ તરફ કિક મારી. બોલ સીધો સ્ટમ્પ સાથે અથડાતાં બેટ્સમેન ક્રિઝમાં પહોંચે તે પહેલાં જ રનઆઉટ થઈ ગયો. આ દૃશ્ય જોઈ ખેલાડીઓ, કોમેન્ટેટરો અને દર્શકો પણ આશ્ચર્યચકિત રહી ગયા.
હિમ્મત સિંહ માત્ર ફિલ્ડિંગમાં જ નહીં પરંતુ બેટિંગમાં પણ ચમક્યા હતા. તેણે 61 રનની મહત્વપૂર્ણ ઇનિંગ્સ રમી પોતાની ટીમને મજબૂત સ્થિતિમાં પહોંચાડી હતી. તેની આ ઓલરાઉન્ડ રમતના કારણે મેચ અંત સુધી રોમાંચક બની રહી. બંને ટીમો વચ્ચેનો મુકાબલો ટાઈ થતાં પરિણામ માટે સુપર ઓવરની જરૂર પડી.
સુપર ઓવરમાં આઉટર દિલ્હી વોરિયર્સે શાનદાર રમત બતાવી જીત પોતાના નામે કરી, પરંતુ મેચ બાદ સૌથી વધુ ચર્ચા હિમ્મત સિંહના ફૂટબોલ સ્ટાઇલ રનઆઉટની થઈ. ક્રિકેટમાં આવા પ્રકારના રનઆઉટ બહુ ઓછા જોવા મળે છે અને તેથી આ ઘટના ખાસ બની ગઈ છે.
હિમ્મત સિંહની હાજરજવાબી, ઝડપી નિર્ણય ક્ષમતા અને અદભૂત ફિલ્ડિંગે સાબિત કર્યું કે આધુનિક ક્રિકેટમાં માત્ર બેટિંગ કે બોલિંગ જ નહીં, પરંતુ ફિલ્ડિંગ પણ મેચનું ચિત્ર બદલી શકે છે. સોશિયલ મીડિયા પર ચાહકો તેના આ અનોખા પ્રયાસની પ્રશંસા કરી રહ્યા છે અને ઘણા લોકો તેને DPL 2026ની સૌથી યાદગાર ક્ષણોમાંથી એક ગણાવી રહ્યા છે.
Craziest run-out by Himmat Singh when the opposition needed 1 run off the last ball.👀#HimmatSingh #DelhiPremierLeague
pic.twitter.com/dJM159yGqL— CREX (@Crex_live) August 4, 2026