દિલ્હી પ્રીમિયર લીગ (DPL) 2026ના બીજા ક્વોલિફાયરમાં સેન્ટ્રલ દિલ્હી કિંગ્સના કેપ્ટન જૉન્ટી સિધુએ પોતાની બેટિંગથી ધમાલ મચાવી દીધી હતી. પુરાની દિલ્હી 6 સામે રમાયેલી મહત્વની મેચમાં જૉન્ટી સિધુએ માત્ર 46 બોલમાં અણનમ 106 રનની વિસ્ફોટક ઈનિંગ રમીને ટીમને ફાઈનલમાં પહોંચાડવામાં મહત્વની ભૂમિકા ભજવી હતી. તેની આ ઈનિંગ દરમિયાન તેણે 10 ગગનચુંબી છગ્ગા અને 5 ચોગ્ગા ફટકાર્યા હતા. તેનો સ્ટ્રાઈક રેટ 230.43 રહ્યો હતો.
મેચમાં સેન્ટ્રલ દિલ્હી કિંગ્સની શરૂઆત ખાસ સારી રહી નહોતી. ઓપનર સિદ્ધાર્થ જૂને 9 બોલમાં 20 રન બનાવ્યા હતા, જ્યારે સમર્થ સિંહ 25 રન બનાવીને પેવેલિયન પરત ફર્યો હતો. ત્યારબાદ યૂગલ સૈની પણ માત્ર 3 રન બનાવી આઉટ થયો હતો. ટીમ મુશ્કેલીમાં દેખાઈ રહી હતી ત્યારે કેપ્ટન જૉન્ટી સિધુ ક્રિઝ પર આવ્યા અને મેચનો આખો માહોલ બદલી નાખ્યો.
જૉન્ટીએ શરૂઆતથી જ આક્રમક વલણ અપનાવ્યું અને પુરાની દિલ્હી 6ના બોલરો પર સતત પ્રહાર કર્યા. ચોગ્ગા-છગ્ગાની મદદથી તેણે સ્કોરબોર્ડને ઝડપથી આગળ ધપાવ્યું. 46 બોલમાં અણનમ 106 રનની તેની ઈનિંગે સેન્ટ્રલ દિલ્હીને 20 ઓવરમાં 5 વિકેટે 218 રનના વિશાળ સ્કોર સુધી પહોંચાડ્યું.
જવાબમાં પુરાની દિલ્હી 6ની ટીમ આ મોટા લક્ષ્યાંક સામે દબાણમાં આવી ગઈ અને સેન્ટ્રલ દિલ્હી કિંગ્સે મેચ 72 રને જીતી લીધી. આ જીત સાથે સેન્ટ્રલ દિલ્હી કિંગ્સે DPL 2026ની ફાઈનલમાં સ્થાન નિશ્ચિત કર્યું.
જૉન્ટી સિધુ માટે આ શતક ખાસ રહ્યું. DPL 2026માં આ તેમનું પ્રથમ શતક છે અને સિઝનની સૌથી મોટી વ્યક્તિગત ઈનિંગ્સમાં તે બીજા ક્રમે છે. આ સિઝનમાં સનત સાંગવાન 111 રન સાથે પ્રથમ સ્થાને છે, જ્યારે જૉન્ટી બાદ અનુજ રાવત 105 અને યશ ધુલ 100 રન સાથે આગળ છે.
Longest SIX of the season so far, still has Jonty’s name written all over it! #AdaniDPL2026 #AdaniDPL #Qualifier2 #DelhiPremierLeague #CDKvsPD6 pic.twitter.com/kngOajxE8t
— Delhi Premier League T20 (@DelhiPLT20) August 28, 2026