ઓસ્ટ્રેલિયાની લોકપ્રિય ટી20 ક્રિકેટ લીગ બિગ બેશ લીગ (BBL)માં આગામી સિઝનથી મોટા ફેરફારો થવા જઈ રહ્યા છે. ક્રિકેટ ઓસ્ટ્રેલિયાએ ખેલાડીઓની ભરતી અને પગાર સાથે જોડાયેલા નિયમોમાં મહત્વપૂર્ણ બદલાવની જાહેરાત કરી છે. સૌથી મોટો નિર્ણય વિદેશી ખેલાડીઓ માટે લાગુ રહેલા ઓવરસીઝ પ્લેયર ડ્રાફ્ટને ખતમ કરવાનો છે. આ ડ્રાફ્ટ સિસ્ટમ 2022માં શરૂ કરવામાં આવી હતી.
નવા નિયમોનો મુખ્ય હેતુ ઓસ્ટ્રેલિયાના ટોચના સ્થાનિક ખેલાડીઓને BBLમાં જાળવી રાખવાનો અને તેમને તેમની પ્રતિભા પ્રમાણે વધુ આકર્ષક પગાર આપવાનો છે. છેલ્લા કેટલાક સમયથી ઓસ્ટ્રેલિયન ખેલાડીઓ અને વિદેશી ક્રિકેટરોના પગારમાં તફાવત અંગે ચર્ચા ચાલી રહી હતી. વૈશ્વિક ટી20 લીગમાં વધી રહેલા પૈસાને કારણે BBL સામે પોતાના સ્ટાર ખેલાડીઓને જાળવી રાખવાનો પડકાર પણ વધી રહ્યો હતો.
2026-27ની સિઝનથી દરેક BBL ટીમે પોતાના ટોચના છ ખેલાડીઓ માટે ઓછામાં ઓછા 17 લાખ ઓસ્ટ્રેલિયન ડોલર ફાળવવાના રહેશે. આ છ ખેલાડીઓમાં ઓછામાં ઓછા ત્રણ ઓસ્ટ્રેલિયન ખેલાડીઓ હોવા જરૂરી રહેશે અને દરેકને નક્કી કરાયેલા લઘુત્તમ પગારથી ઓછું ચૂકવી શકાશે નહીં.
આ ફેરફારનો સીધો ફાયદો ઓસ્ટ્રેલિયાના જાણીતા ક્રિકેટરોને મળી શકે છે. BBL હવે વિદેશી ખેલાડીઓને સાઇન કરવા માટેની ફરજિયાત વ્યવસ્થા દૂર કરીને ટીમોને વધુ સ્વતંત્રતા આપશે. પરિણામે ખેલાડીઓ અને ફ્રેન્ચાઇઝી વચ્ચે સીધી વાટાઘાટો માટે વધુ જગ્યા બનશે.
ક્રિકેટ ઓસ્ટ્રેલિયાની આ નવી નીતિનો હેતુ BBLને વૈશ્વિક ટી20 સ્પર્ધામાં વધુ મજબૂત બનાવવાનો છે. સાથે જ સ્થાનિક ક્રિકેટરોને યોગ્ય નાણાકીય પુરસ્કાર આપીને ઓસ્ટ્રેલિયન સ્ટાર્સને અન્ય લીગ તરફ જતા રોકવાનો પ્રયાસ કરવામાં આવી રહ્યો છે.
આ ફેરફારો બાદ આગામી BBL સિઝનમાં ખેલાડીઓની સાઇનિંગ પ્રક્રિયા અને ટીમોની રચના અગાઉ કરતાં ઘણી અલગ જોવા મળી શકે છે.
🚨The BBL’s overseas player draft, introduced in 2022, is being removed.
Franchises will now have greater flexibility when signing overseas players. pic.twitter.com/A6jxVdfXk1
— TheWicketReport (@WicketReport) August 25, 2026