2 વર્ષના વિરામ બાદ પાછી ફરી LPL

શ્રીલંકામાં ફરી એકવાર T20 ક્રિકેટનો જબરદસ્ત રોમાંચ જોવા મળશે. લગભગ બે વર્ષના વિરામ બાદ લંકા પ્રીમિયર લીગ (LPL) 2026ની વાપસી થઈ રહી છે અને હવે ટૂર્નામેન્ટનું સંપૂર્ણ શેડ્યૂલ પણ જાહેર કરવામાં આવ્યું છે. LPL 2026ની શરૂઆત 17 જુલાઈથી થશે, જ્યારે પ્રથમ મેચમાં 2024ની ફાઇનલિસ્ટ ટીમો જાફના અને ગોલ આમને-સામને ટકરાશે. આ મુકાબલો કોલંબોના SSC ગ્રાઉન્ડ પર રમાશે અને મેચ પહેલાં ભવ્ય ઓપનિંગ સેરેમનીનું આયોજન પણ કરવામાં આવશે.
આ ટૂર્નામેન્ટ 17 જુલાઈથી 8 ઑગસ્ટ સુધી ચાલશે, જ્યારે ફાઇનલ માટે 9 ઑગસ્ટનો રિઝર્વ ડે રાખવામાં આવ્યો છે. શરૂઆતના મુકાબલા કોલંબોમાં રમાશે, ત્યારબાદ લીગ દાંબુલા અને કેન્ડી સુધી પહોંચશે. નોકઆઉટ અને ફાઇનલ મેચો ફરી કોલંબોના આર. પ્રેમદાસા સ્ટેડિયમમાં યોજાશે.

LPL 2026માં કુલ પાંચ ટીમો ભાગ લેશે, જે જાફના, કોલંબો, કેન્ડી, ગોલ અને દાંબુલાનું પ્રતિનિધિત્વ કરશે. જોકે, ફ્રેન્ચાઇઝીઓના સત્તાવાર નામ અને માલિકી અંગેની જાહેરાત હજી બાકી છે. આ વખતે ટૂર્નામેન્ટમાં મોટો ફેરફાર કરવામાં આવ્યો છે. છેલ્લા બે સીઝનની જેમ ઓક્શન નહીં થાય, પરંતુ 1 જૂને પ્લેયર ડ્રાફ્ટ યોજાશે. ડ્રાફ્ટ સિસ્ટમ લાગુ થવાને કારણે કોઈ પણ ટીમને પોતાના જૂના ખેલાડીઓને રિટેન કરવાની મંજૂરી નહીં મળે.
દરેક ટીમ માટે ઓછામાં ઓછા 18 અને વધુમાં વધુ 20 ખેલાડીઓની સ્ક્વોડ ફરજિયાત રહેશે. સાથે જ શ્રીલંકા ક્રિકેટ બોર્ડે સ્થાનિક યુવા પ્રતિભાને પ્રોત્સાહન આપવા માટે દરેક ટીમમાં બે સ્થાનિક U-23 ઇમર્જિંગ ખેલાડીઓને સામેલ કરવાનું ફરજિયાત બનાવ્યું છે. જેમાંથી ઓછામાં ઓછો એક ખેલાડી પ્લેઇંગ ઇલેવનમાં રમશે.
LPL 2026 શેડ્યૂલ:17-19 જુલાઈ:કોલંબો લેગ
•21-26 જુલાઈ: દાંબુલા લેગ
•28 જુલાઈ-2 ઑગસ્ટ: કેન્ડી લેગ
•5 અને 7 ઑગસ્ટ: ક્વોલિફાયર અને એલિમિનેટર
•8 ઑગસ્ટ: ફાઇનલ
•9 ઑગસ્ટ: રિઝર્વ ડે