ભારતીય ક્રિકેટના દિગ્ગજ ખેલાડી સચિન તેંડુલકરના પુત્ર અર્જુન તેંડુલકરને લઈને મોટું અપડેટ સામે આવ્યું છે. 26 વર્ષીય ડાબોડી ઝડપી બોલર અર્જુન આગામી 2026ની ઘરેલુ ક્રિકેટ સિઝનમાં પણ ગોવા તરફથી રમતો જોવા મળશે. આ સાથે ગોવા સાથે તેનો સંબંધ સતત પાંચમા વર્ષ સુધી જળવાઈ રહેશે.
અર્જુનનો જન્મ મુંબઈમાં થયો હોવા છતાં તેને મુંબઈની ટીમમાં પૂરતી તકો મળતી ન હોવાથી તેણે 2022-23ની સિઝનથી ગોવા તરફથી રમવાનું શરૂ કર્યું હતું. ત્યારથી તે ગોવાની ટીમનો મહત્વનો ભાગ બની ગયો છે. ખાસ કરીને બોલિંગમાં અર્જુને ટીમ માટે ઉપયોગી યોગદાન આપ્યું છે.
અર્જુન તાજેતરમાં ગોવાની ઓમાન ટૂરનો ભાગ બન્યો નહોતો. તેના કારણે એવી અટકળો શરૂ થઈ હતી કે કદાચ તે આગામી ઘરેલુ સિઝનમાં ગોવાથી અલગ થઈ શકે છે. જોકે, હવે આ તમામ અટકળોનો અંત આવી ગયો છે અને તે ગોવા સાથે જ આગળ વધશે.
ગોવા માટે ફર્સ્ટ ક્લાસ ક્રિકેટમાં અર્જુને પોતાની બોલિંગથી ખાસ છાપ છોડી છે. 2022-23ની સિઝનથી અત્યાર સુધી તેણે ગોવા માટે 50 ફર્સ્ટ ક્લાસ વિકેટનો આંકડો પાર કર્યો છે. આ પ્રદર્શન તેને ટીમના મહત્વના ઝડપી બોલરોમાં સ્થાન અપાવે છે.
અર્જુને રણજી ટ્રોફીમાં ગોવા માટે પોતાના ડેબ્યૂ મુકાબલામાં જ શાનદાર બેટિંગ કરતાં સદી ફટકારી હતી. હવે 2026ની નવી ઘરેલુ સિઝનમાં તેની પાસેથી બોલિંગ ઉપરાંત બેટિંગમાં પણ ઉપયોગી યોગદાનની અપેક્ષા રહેશે.
IPL 2026માં અર્જુન મુંબઈ ઈન્ડિયન્સમાંથી ટ્રેડ થઈને લખનઉ સુપર જાયન્ટ્સ સાથે જોડાયો હતો. જોકે ઘરેલુ ક્રિકેટમાં તે ગોવા સાથેનો પ્રવાસ ચાલુ રાખશે. હવે તેની નજર આગામી સિઝનમાં વધુ સતત પ્રદર્શન કરીને પોતાની ઓળખ મજબૂત બનાવવા પર રહેશે.