દક્ષિણ આફ્રિકાની ટીમને નામિબિયા અને ઝિમ્બાબ્વે સામેની આગામી T20I ટ્રાઇ-સિરીઝ પહેલાં મોટો ઝટકો લાગ્યો છે. ટીમનો ઓલરાઉન્ડર જેસન સ્મિથ ઈજાના કારણે આ સમગ્ર ટ્રાઇ-સિરીઝમાંથી બહાર થઈ ગયો છે. ક્રિકેટ સાઉથ આફ્રિકા (CSA)એ સોમવારે તેની ઈજાની પુષ્ટિ કરી હતી.
31 વર્ષીય જેસન સ્મિથને જમણી બાજુના એડક્ટર મસલમાં ઈજા થઈ છે. આ ઈજાને કારણે તે નામિબિયામાં યોજાનારી T20I ટ્રાઇ-સિરીઝમાં દક્ષિણ આફ્રિકાનું પ્રતિનિધિત્વ કરી શકશે નહીં. CSAએ હાલમાં તેના સ્થાને કોઈ નવા ખેલાડીને ટીમમાં સામેલ કરવાનો નિર્ણય લીધો નથી. સ્મિથની વધુ તપાસ કરવામાં આવશે, ત્યારબાદ 9 સપ્ટેમ્બરથી શરૂ થનારી નામિબિયા સામેની ODI સિરીઝ માટે તેની ઉપલબ્ધતા અંગે નિર્ણય લેવામાં આવશે.
નામિબિયાના વિન્ડહોકમાં રમાનારી આ T20I ટ્રાઇ-સિરીઝ 28 ઓગસ્ટથી 6 સપ્ટેમ્બર સુધી ચાલશે. તેમાં દક્ષિણ આફ્રિકા ઉપરાંત યજમાન નામિબિયા અને ઝિમ્બાબ્વેની ટીમ ભાગ લેશે. આ સિરીઝમાં દક્ષિણ આફ્રિકાની ટીમની કમાન ડાબોડી સ્પિનર બ્યોર્ન ફોર્ટુઇન સંભાળશે.
ટ્રાઇ-સિરીઝ માટે દક્ષિણ આફ્રિકાની ટીમમાં ઘણા યુવા ખેલાડીઓને તક આપવામાં આવી છે. એથન બોશ, ડુઆન જાનસેન, ડેવાલ્ડ બ્રેવિસ, ટોની ડી ઝોર્ઝી અને ક્વેના મફાકા જેવા ખેલાડીઓ ટીમનો ભાગ છે. કેટલાક અનુભવી ખેલાડીઓને આરામ આપવામાં આવ્યો હોવાથી યુવા ખેલાડીઓ માટે પોતાની ક્ષમતા સાબિત કરવાની આ મહત્વપૂર્ણ તક બની શકે છે.
આ ટ્રાઇ-સિરીઝ 2026 T20 વર્લ્ડ કપ બાદ દક્ષિણ આફ્રિકાની પ્રથમ T20I સિરીઝ હશે. હવે ટીમ મેનેજમેન્ટની નજર સ્મિથની ફિટનેસ પર રહેશે અને જો તે સમયસર સાજો નહીં થાય તો ODI સિરીઝમાં પણ તેની ગેરહાજરી જોવા મળી શકે છે.
Proteas Men Squad Update – Namibia White-ball Tour 🚨
Hollywoodbets Dolphins all-rounder Jason Smith has been ruled out of the T20 International (T20I) Tri-series against Namibia and Zimbabwe in Windhoek due to a right adductor muscle strain.
He will undergo further… pic.twitter.com/64gPVDDufS
— Proteas Men (@ProteasMenCSA) August 24, 2026