ઝિમ્બાબ્વેના અનુભવી ઓલરાઉન્ડર અને કેપ્ટન સિકંદર રઝાએ બાંગ્લાદેશ સામેની ત્રીજી અને નિર્ણાયક ટી20 મેચમાં ભલે ટીમને જીત અપાવી ન શક્યા હોય, પરંતુ પોતાના નામે એક ઐતિહાસિક સિદ્ધિ નોંધાવી છે. બુલાવાયોમાં રમાયેલી આ મેચ રઝાની આંતરરાષ્ટ્રીય કારકિર્દીની 314મી મેચ હતી અને તેની સાથે જ તેઓ ઝિમ્બાબ્વે માટે સૌથી વધુ આંતરરાષ્ટ્રીય મેચ રમનાર ક્રિકેટર બની ગયા છે.
40 વર્ષીય સિકંદર રઝાએ વર્ષ 2013માં બાંગ્લાદેશ સામે જ આંતરરાષ્ટ્રીય ક્રિકેટમાં ડેબ્યૂ કર્યું હતું. ત્યારથી અત્યાર સુધી તેણે ઝિમ્બાબ્વે માટે ત્રણેય ફોર્મેટમાં સતત શાનદાર યોગદાન આપ્યું છે. તેના નામે હાલમાં 22 ટેસ્ટ, 156 વનડે અને 136 ટી20 આંતરરાષ્ટ્રીય મેચ રમવાનો રેકોર્ડ નોંધાયો છે. તેની આ સિદ્ધિ ઝિમ્બાબ્વે ક્રિકેટ માટે ગૌરવની ક્ષણ માનવામાં આવી રહી છે.
જોકે આ ખાસ પ્રસંગે ઝિમ્બાબ્વેને જીત મળી નહોતી. બુલાવાયોમાં રમાયેલી ત્રીજી ટી20 મેચમાં બાંગ્લાદેશે ચાર વિકેટે વિજય મેળવી ત્રણ મેચની શ્રેણી 2-1થી પોતાના નામે કરી લીધી. ઝિમ્બાબ્વેએ પ્રથમ બેટિંગ કરતાં 20 ઓવરમાં 143/7નો સ્કોર બનાવ્યો હતો, જેમાં ડિયોન માયર્સે 73 રનની મહત્વપૂર્ણ ઇનિંગ્સ રમી હતી. જવાબમાં બાંગ્લાદેશ તરફથી તન્ઝીદ હસને અણનમ 66 રનની શાનદાર ઇનિંગ્સ રમી ટીમને જીત અપાવી હતી.
સિકંદર રઝાની કારકિર્દી માત્ર આંકડાઓ પૂરતી સીમિત નથી. બેટ અને બોલ બંનેથી મેચ જીતાડવાની તેની ક્ષમતાએ ઝિમ્બાબ્વે ક્રિકેટને અનેક યાદગાર જીત અપાવી છે. છેલ્લા કેટલાક વર્ષોમાં તેઓ ટીમના સૌથી વિશ્વસનીય ખેલાડીઓમાં સામેલ રહ્યા છે અને વિશ્વભરની વિવિધ ટી20 લીગમાં પણ પોતાની પ્રતિભાનો પરિચય આપ્યો છે.
ભલે આ ઐતિહાસિક મેચમાં ઝિમ્બાબ્વેને હારનો સામનો કરવો પડ્યો હોય, પરંતુ સિકંદર રઝાની 314મી આંતરરાષ્ટ્રીય મેચ અને દેશ માટે સૌથી વધુ મેચ રમવાનો રેકોર્ડ લાંબા સમય સુધી યાદ રાખવામાં આવશે. તેની આ સિદ્ધિ યુવા ઝિમ્બાબ્વે ક્રિકેટરો માટે પણ પ્રેરણારૂપ બની રહેશે.
सिकंदर रजा ने छुआ बड़ा मुकाम, जिम्बाब्वे के लिए सबसे ज्यादा मैच खेलने वाले प्लेयर बने#SikandarRaza #Crickethttps://t.co/vHlEaU4avI
— India TV (@indiatvnews) July 20, 2026