ICC મહિલા T20 વર્લ્ડ કપ 2026ની શરૂઆત પહેલાં એક ખાસ આંકડો ચર્ચામાં આવ્યો છે. 2009માં પ્રથમ વખત યોજાયેલા મહિલા T20 વર્લ્ડ કપથી લઈને અત્યાર સુધીના તમામ સંસ્કરણોમાં ભાગ લેનાર ખેલાડીઓની યાદી સામે આવી છે, જેમાં ભારતની સ્ટાર ઓલરાઉન્ડર અને કેપ્ટન Harmanpreet Kaurનું નામ પણ સામેલ છે.
મહિલા T20 વર્લ્ડ કપની 10મી આવૃત્તિ 12 જૂનથી ઇંગ્લેન્ડ અને વેલ્સમાં રમાશે. આ ટૂર્નામેન્ટ મહિલા ક્રિકેટના સૌથી મોટા મંચોમાંથી એક માનવામાં આવે છે અને તેમાં વિશ્વની શ્રેષ્ઠ ટીમો ભાગ લેશે.
હરમનપ્રીત કૌરે 2009માં પોતાના વર્લ્ડ કપ અભિયાનની શરૂઆત કરી હતી અને ત્યારથી દરેક આવૃત્તિમાં ભારતનું પ્રતિનિધિત્વ કર્યું છે. તેની કારકિર્દી દરમિયાન તેણે અનેક યાદગાર ઇનિંગ્સ રમી છે અને ભારતીય મહિલા ક્રિકેટને વૈશ્વિક સ્તરે નવી ઓળખ અપાવી છે. હાલમાં પણ તેઓ ભારતીય ટીમનું નેતૃત્વ કરી રહી છે અને 2026 વર્લ્ડ કપમાં ભારતની સૌથી મોટી આશાઓમાંથી એક ગણાય છે.
આ યાદીમાં વિવિધ દેશોની કેટલીક અનુભવી ખેલાડીઓનો પણ સમાવેશ થાય છે, જેણે વર્ષો સુધી આંતરરાષ્ટ્રીય ક્રિકેટમાં સતત પોતાનું સ્થાન જાળવી રાખ્યું છે. પરંતુ ભારતીય ક્રિકેટ માટે ગૌરવની વાત એ છે કે હરમનપ્રીત કૌર આ વિશિષ્ટ ક્લબનો ભાગ છે. તેની ફિટનેસ, અનુભવ અને દબાણની ક્ષણોમાં મેચ જીતાડવાની ક્ષમતાએ તેને વિશ્વ ક્રિકેટની સૌથી સફળ મહિલા ખેલાડીઓમાં સ્થાન અપાવ્યું છે.
ભારત 2026 મહિલા T20 વર્લ્ડ કપમાં પોતાના અભિયાનની શરૂઆત પાકિસ્તાન સામે કરશે. ચાહકોને આશા છે કે હરમનપ્રીત કૌરના નેતૃત્વમાં ભારતીય ટીમ આ વખતે પ્રથમ વખત મહિલા T20 વર્લ્ડ કપ ટ્રોફી જીતવાનું સપનું સાકાર કરશે.