T20 વર્લ્ડ કપ પહેલા પાકિસ્તાન ક્રિકેટ ટીમની મુશ્કેલીઓ ઓછી થવાનું નામ નથી લઈ રહી. ઈંગ્લેન્ડ સામે ચાલી રહેલી ટી-20 સિરીઝ દરમિયાન નસીમ શાહ બાદ હવે હૈદર અલીને વાયરલ બીમારીના કારણે હોસ્પિટલમાં લઈ જવામાં આવ્યો છે.
તમને જણાવી દઈએ કે, નસીમ શાહને પણ તાવના કારણે હોસ્પિટલમાં દાખલ કરવામાં આવ્યો હતો, જ્યાં તપાસમાં જાણવા મળ્યું હતું કે તેમને ન્યુમોનિયા છે. હોસ્પિટલમાંથી રજા આપતા પહેલા આ ફાસ્ટ બોલર પણ કોરોનાની ઝપેટમાં આવી ગયો હતો. આવી સ્થિતિમાં હૈદર અલીનું હોસ્પિટલ પહોંચવું પાકિસ્તાન ક્રિકેટ ટીમ માટે ચિંતાનો વિષય છે.
ઈંગ્લેન્ડ વિરુદ્ધ લાહોરમાં રમાયેલી 6ઠ્ઠી T20માં 14 બોલમાં 18 રન બનાવનાર હૈદર અલીને ડ્રેસિંગ રૂમમાં ચક્કર આવ્યા બાદ તેને હોસ્પિટલમાં લઈ જવામાં આવ્યો હતો. જો કે, તેમના સ્વાસ્થ્ય વિશે હજુ સુધી કોઈ અન્ય અપડેટ બહાર આવ્યું નથી.
નસીમ શાહ વિશે વાત કરતાં, તેને હોસ્પિટલમાંથી રજા આપવામાં આવી છે, પાકિસ્તાન ક્રિકેટ બોર્ડે ગુરુવારે જણાવ્યું હતું કે શાહને ન્યુમોનિયા હોવાનું નિદાન થતાં હોસ્પિટલમાંથી રજા આપવામાં આવી હતી. તે ઘણું સારું અનુભવી રહ્યો છે. બોર્ડ દ્વારા જારી કરવામાં આવેલી પ્રેસ રિલીઝ અનુસાર, શાહ ટીમ હોટલમાં પાછા ફર્યા છે જ્યાં તેઓ કોવિડ-19 સંબંધિત તમામ પ્રોટોકોલનું પાલન કરશે.
પાકિસ્તાનની ટીમ સોમવારે ન્યુઝીલેન્ડ પ્રવાસ માટે રવાના થશે જ્યાં તેને ત્રિકોણીય શ્રેણીમાં ભાગ લેવાનો છે. બાંગ્લાદેશ આ શ્રેણીની ત્રીજી ટીમ છે. પીસીબીએ એ સ્પષ્ટ કર્યું નથી કે નસીમ ન્યૂઝીલેન્ડ પ્રવાસનો ભાગ બનશે કે નહીં.