શ્રેયસ અય્યર નહીં બને કેપ્ટન

ભારતીય ક્રિકેટ ચાહકો માટે એક મોટા સમાચાર સામે આવ્યા છે. વર્ષના અંતમાં ભારત ‘A’ ટીમ નેપાળના પ્રવાસે જશે, જ્યાં બંને ટીમો વચ્ચે ત્રણ મેચોની ટી-20 શ્રેણી રમાશે. આ શ્રેણીની તમામ મેચો કાઠમંડુના ત્રિભુવન યુનિવર્સિટી ઇન્ટરનેશનલ ક્રિકેટ ગ્રાઉન્ડ, કીર્તીપુર ખાતે યોજાવાની છે. શ્રેણીની શરૂઆત 9 ડિસેમ્બરથી થશે, જ્યારે બીજી અને ત્રીજી મેચ અનુક્રમે 11 અને 13 ડિસેમ્બરે રમાશે.

મહત્વની વાત એ છે કે આ પ્રવાસ માટે ભારતની સિનિયર ટીમ નહીં પરંતુ ભારત ‘A’ ટીમ જશે. તેથી હાલના ટી-20 કેપ્ટન શ્રેયસ અય્યરને નહીં, પરંતુ યુવા ખેલાડીઓમાંથી કોઈ એકને ટીમની કમાન સોંપવામાં આવે તેવી ચર્ચા છે. અહેવાલો અનુસાર કેપ્ટન બનવાની રેસમાં ત્રણ ખેલાડીઓના નામ સૌથી આગળ છે.

આ યાદીમાં પ્રથમ નામ રજત પાટીદારનું છે. આઈપીએલ અને સ્થાનિક ક્રિકેટમાં તેની શાનદાર કેપ્ટનશિપે સૌનું ધ્યાન ખેંચ્યું છે. બેટિંગની સાથે નેતૃત્વ ક્ષમતાના કારણે બીસીસીઆઈ તેને મોટી જવાબદારી સોંપી શકે છે.

બીજું નામ રિયાન પરાગનું છે. અગાઉ શ્રીલંકા પ્રવાસ માટે તેમને ભારત ‘A’ ટીમનો ઉપકેપ્ટન બનાવવામાં આવ્યો હતો, પરંતુ ઈજાના કારણે તેઓ બહાર થઈ ગયા હતા. હવે નેપાળ પ્રવાસમાં તેને કેપ્ટન બનાવવાની શક્યતા વ્યક્ત કરવામાં આવી રહી છે. સ્થાનિક ક્રિકેટ અને આઈપીએલમાં કેપ્ટનશિપનો અનુભવ તેના પક્ષમાં જઈ શકે છે.

ત્રીજો દાવેદાર વિકેટકીપર બેટ્સમેન ધ્રુવ જુરેલ છે. તેણે અગાઉ અનાધિકૃત ટેસ્ટ શ્રેણીમાં ભારત ‘A’ની સફળતાપૂર્વક કમાન સંભાળી હતી અને તાજેતરમાં ટી-20 ક્રિકેટમાં પણ પ્રભાવશાળી પ્રદર્શન કર્યું છે. આવી સ્થિતિમાં બીસીસીઆઈ યુવા નેતૃત્વને તક આપવા માટે જુરેલ પર પણ વિશ્વાસ મૂકી શકે છે.

હાલ બીસીસીઆઈએ સત્તાવાર રીતે કેપ્ટનની જાહેરાત કરી નથી, પરંતુ ટૂંક સમયમાં ટીમની જાહેરાત થવાની શક્યતા છે. આ પ્રવાસ યુવા ખેલાડીઓને પોતાની પ્રતિભા સાબિત કરવાની સાથે ભવિષ્યમાં ભારતીય સિનિયર ટીમમાં સ્થાન મજબૂત કરવાની મહત્વપૂર્ણ તક સાબિત થઈ શકે છે.