ભારત અને શ્રીલંકા વચ્ચે રમાઈ રહેલી બીજી ટેસ્ટ મેચ દરમિયાન શ્રીલંકાના સ્પિનર પ્રભાત જયસૂર્યા મુશ્કેલીમાં મુકાયા છે. આંતરરાષ્ટ્રીય ક્રિકેટ કાઉન્સિલ (ICC)એ મેદાન પરના તેના વર્તન બદલ સત્તાવાર ફટકાર લગાવી છે. આ સાથે તેના શિસ્તભંગના રેકોર્ડમાં એક ડિમેરિટ પોઈન્ટ પણ ઉમેરવામાં આવ્યો છે.
આ ઘટના ટેસ્ટ મેચના બીજા દિવસની રમતના અંતિમ તબક્કામાં બની હતી. ભારતીય બોલર માનવ સુથારની બોલિંગમાં જયસૂર્યા આઉટ થયા બાદ પેવેલિયન તરફ પરત ફરી રહ્યા હતા. આ દરમિયાન તેઓ પોતાના આઉટ થવાથી નારાજ દેખાયા અને ગુસ્સામાં બાઉન્ડ્રી માર્કર પર બેટ મારી દીધું હતું. ICCએ તેની આ હરકતને ક્રિકેટના સાધનો અને મેદાનની સંપત્તિના દુરુપયોગ તરીકે ગણાવી છે. આ મામલો ICCની આચાર સંહિતાની કલમ 2.2 હેઠળ લેવલ-1ના ગુના તરીકે નોંધાયો હતો.
મેચ રેફરી એન્ડી પાયક્રોફ્ટે જયસૂર્યાને સત્તાવાર ફટકાર સાથે એક ડિમેરિટ પોઈન્ટ આપ્યો છે. ખાસ વાત એ છે કે જયસૂર્યાએ પોતાની ભૂલ સ્વીકારી લીધી હતી અને ICC દ્વારા આપવામાં આવેલી સજા સામે કોઈ વાંધો ઉઠાવ્યો નહોતો. તેથી આ મામલે અલગથી સુનાવણી કરવાની જરૂર પડી નહોતી. આ કાર્યવાહી મેદાન પરના અમ્પાયરો અહસાન રઝા અને શરફુદ્દૌલા ઇબ્ને શાહિદ સહિત અન્ય અધિકારીઓની ભલામણના આધારે કરવામાં આવી હતી.
આ ટેસ્ટમાં શિસ્તને લઈને આ પહેલો વિવાદ નથી. મેચના પ્રથમ દિવસે ભારતના યશસ્વી જયસ્વાલ અને શ્રીલંકાના અસિતા ફર્નાન્ડો વચ્ચે મેદાન પર બોલાચાલી થઈ હતી. બંને ખેલાડીઓને ICCએ 25 ટકા મેચ ફીનો દંડ અને એક-એક ડિમેરિટ પોઈન્ટ આપ્યો હતો.
જયસૂર્યાને મળેલી આ સજા ફરી એકવાર યાદ અપાવે છે કે આંતરરાષ્ટ્રીય ક્રિકેટમાં ખેલાડીઓ પાસેથી મેદાન પર સંયમ અને રમતની સંપત્તિ પ્રત્યે યોગ્ય વર્તનની અપેક્ષા રાખવામાં આવે છે.
Prabath Jayasuriya has been reprimanded and handed one demerit point for breaching Article 2.2 of the ICC Code of Conduct
The sanction relates to Jayasuriya hitting the boundary wedges with his bat after being dismissed pic.twitter.com/5avw3bLXkx
— Cricbuzz (@cricbuzz) August 25, 2026